نفسي وامنيتي / م . بلال الشرمان

نفسي وامنيتي ألاقي صندوق ذهب يا جدة .. والله غير اكيف….
وثاني يوم عشت الجو، بصراحة ” اشي فاخر من الاخر” حسيت انه لا مستحيل تحت الشمس ، يعني صرت اقوى واحد بالدنيا وارجعت اسرع واحد بالحارة …..

حسيت إني ربحت المليون ، أما اصحاب الحكم والأمثال الفاضية مثل: “من زرع حصد” و لكل مجتهد نصيب ” فكونا منهم ، ولا احسن من المصاري اللي بتيجيك بلا تعب ، وبعدين مش اي مصاري ، صندوق ذهب مليان ليرات تركية .

المهم اللي صحاني من الحلم انه لقيت يومها نص ليره بالشارع ” صدفة اتعس من تحويلة طريق اربد – عمان ” ، المهم حبيت استمر بالحلم ( ولو انة شو الصوص وشو مرقته ) بس مش مشكلة ، عملت حالي فرحان كثير ، من الفرحة ما عرفت كيف أصرفها فقلت خليني احط خطة عمل عشان اصرفها ( مثل خطط حكوماتنا ) ، هي ما بتكفي أجرة باص ، ولا حق كيلو لحمة، ولا حتى بتجيب بلوزة ولا بنطلون صيني نخب عاشر…. وإذا بدي اطلع أفطر فيها ما بتجيب سندويشة سوبر واذا بدي اشتري كاسة قهوة فيها لازم أطلع لحالي، وأقعد مع الحيطان، لأنها يادوب تكفيني ، بس بضل اسمها مصاري وبدون تعب يذكر …..

فكرت كثير وأنا “جاخ وشايف حالي ” ، حسيت إني اقطاعي …..قلت خليني وانا مروح وبدي اشتري اغراض البيت احطها مع الفراطات وبصرفها بدون ما اعرف ، المهم ولما وصلت البيت كانوا الخمسين ليرة طاروا زي الملايين الي طارت بهالبلد، وطارت فرحة النص ليرة ، لا اللي زرع وحصد بيفرح ولا إلي بيحصد بدون يزرع بيفرح.. زي اللي بينفخ في “قربة مخزوقة”….
وساعتها شعرت اني فاسد لانة صرفت النص ليرة ، وحتى البيض البلدي.. قالوا عنه فاسد.. حتى البيض فاسد …
على فكرة هذا حلم كل الطفرانين بالبلد .. وما أكثر الطفرانين .. بس كيف الحلم الجميل وصل للبيض الفاسد ما بعرف!!!