التنفيسة والمزاج الرايق
الي يغيب عن الاردن فترة طويلة، رح يحس انه الاردن كثير متغيرة. واكثر شي متغير وملفت للنظر فيها هي حجم المقاهي التي انتشرت وبشكل واسع لتغطي معظم شوارع الاردن.
بصراحة تشوف ما بين مقهى ومقهى، ركن وقعدات مخصصة للأراجيل. وانا مستغرب انه لسى شارع البتراء في اربد ما دخل موسوعة جينيس لعدد الاراجيل الموجودة في الشارع. القادم الى الشارع يرى من بعيد حجم الدخان المتطاير على طوله وكانه يقترب من مصفاة بترول. قعدات على امتداد الشارع لا تكاد تخلو من أرجيلة، شباب وصبايا، ازواج وزوجات، الكل بيأرجل. وكأنها اصبحت ظاهرة عامة تميز الشعب الاردني مثلها مثل المنسف.
انا مش عارف ليش الناس تأرقل!!؟؟
لما تيجي تسأل واحد ليش يأرقل، هنا تختلف الاراء. الي يحكيلك “انه يأرقل عشان المزاج الرايق”،
والي يحكيلك” مهو كل الناس بتأرقل،”
والي يحكيلك ” هو خلي الواحد ساكت ، هو انت مش حاسس بالناس و مشاكلهم!!؟؟ خليهم ينفسوا عن همومهم!!؟؟
بصراحة جواب الشخص الاخير عجبني، انه الارجيلة عبارة عن ” تنفيسة” يعني معقول ادفع على كل قعدة أرجيلة شي 5 دنانير ، اي بما يقلرب شي 40 دينار شهري عشان تنفيسة، وضيف الهم شي 40 دينار شهري دخان سجاير كمان تنفيسة. والله طلعت التنفيسة مش رخيصة عنا احنا الاردنيين !!؟؟
احكيلكوا شي ثاني لازم في مؤسساتنا يكون في هناك غرف مخصصة للاراجيل، يعني عشان ينعدل الراس ونصير نشتغل بمزاج رايق. يعني مش معقول نظل مكشرين طول ما احنا نشتغل باماكن عملنا. حتى واحنا مروحين بطريقنا للبيت، لازم يكون في السيارة ارجيلة عشان كمان نعدل مزاجنا قبل لا ندخل على منازلنا واحنا مكشرين. حرام نظلم زوجاتنا واولادنا بكشرتنا.
واكثر شي عجبني لما تعزم ناس على تعليلة عرس، ويجيلك شباب عشان يشاركوا الفرح، بتلاقيهم جايين ومعهم الارجيلة. يوخذوا شي زاوية ويبلشوا يأرجلوا. يا جماعة والله عزمناكوا عشان تشاركونا الفرح ، مش عشان ” التنفيسة ” ولا عشان ” تعدلوا مزاجكم ”
الارجيلة للتنفيسة
الارجيلة للمزاج الرايق
