ساعدونا … بس لا تذلّونا

بسم الله الرحمن الرحيم
ساعدونا … بس لا تذلّونا
نهيل الشقران

– في حدا بدقّ عباب الدّار ؟؟
– اه والله سامعه ، بس والله منا قادر أقوم
– ولك قومي يا حجه ، بلكي حدا فقدنا بخبزات، والله متنا من الجوع
– يا الله ساعدني ، يلا خليني أشوف مين، يقطع شيطانك انت.
– مين عالباب؟
– افتحي يا حجّه ، جايبينلك شويّة غراض للدار
– هلا بيكم يا بنيي
– فوتو شباب
– شو هاض اللي بلامع بوجهي؟
– بدنا نوخذلك صورة انتي والحجّي ونتي بتستلمي منّي هالغراض؟
– ولويش خيّو ؟ أنا أتصوّر وتطلع صورتي قدّام الناس؟ مشان كم زر بطاطا ، ورغيفين خبز؟
أقلّك ؟ روح انعثر ، وربنا الغني عنّك وعن اللي جبته معك.
يأتي أبو مصلح ويقول: صحيح احنا فقرا بالمال بس نفوسنا عفيفة وغنيّة بالكرامه
واحنا ما بدنا عطاياكم، ولك روح شوف اوروبا، بشتروا أغراض وبغلفوها وبحطوها عالشارع وبيجي الفقير بوخذ منها بدون ما يدري من مين ولا من وين !!!
– آسفين يا حج ويا حجه، بلّا شباب، ما في فايده
– والأغراض؟؟؟
– جيبوها معكوا هاي ناس ما بتستاهل !!!
قال تعالى : ﴿ يَا أَيُّهَا الَّذِينَ آمَنُوا لَا تُبْطِلُوا صَدَقَاتِكُمْ بِالْمَنِّ وَالْأَذَى كَالَّذِي يُنْفِقُ مَالَهُ رِئَاءَ النَّاسِ وَلَا يُؤْمِنُ بِاللَّهِ وَالْيَوْمِ الْآخِرِ فَمَثَلُهُ كَمَثَلِ صَفْوَانٍ عَلَيْهِ تُرَابٌ فَأَصَابَهُ وَابِلٌ فَتَرَكَهُ صَلْدًا لَا يَقْدِرُونَ عَلَى شَيْءٍ مِمَّا كَسَبُوا وَاللَّهُ لَا يَهْدِي الْقَوْمَ الْكَافِرِينَ ﴾.