الفقر ذل
نهيل الشقران
– بدي افل من هالبلد خلص أنا بطلت أقدر أتحمل
– شو في يابن الحلال ليش متضايق ؟
– شو في ؟ ناسيه إنه إبنك قربت نتيجته تطلع بالتوجيهي
– طيب بعرف ونا بستنى يوم النتايج بالثانيه مش بالدقيقه
– يا حسرتي عليكي بس
– ليش شو في هلكتني واقلقتني
– مهو لازم تقلقي وأنا كمان أقلق معك
– يا مشحر شو في ؟ لا يكون طلعت النتايج وابننا سقط
– يا ريت يسقط يا ريت
– شو بتقول فال الله ولا فالك
– ولك ناسيه إنه عيشتنا يوم بيوم وما معي قرش ادرس الولد بالجامعة مثله مثل صحابه
– والله هاي ما حسبت حسابها لا والله
– عرفتي هسا ليش أنا مهموم ؟ أنا مهموم على هالولد لأنه من الأوائل وأمنية حياته يقرا طب أو هندسه ونا ما معي أدرسه لا هون ولا برا
– بلكي طلعله بعثه توكل على الله
– وبلكي ما طلعله ساعتها شو العمل ؟
– يا رجل لا تقدر البلا قبل وقوعه ، خليك متفائل
– والله أنا بحسب حساب كل شي وهيك لازم يصير
– طيب شو العمل ؟
– يا رب يرسب هالولد ولا إني أكسر بخاطره وما أدرسه التخصص اللي بده ياه
– ول لهالدرجه ؟
– لهالدرجه وأكثر ، حيشاكي وحيشا السامعين الله يقطع الفقير ويقطع عيشته
مهو أصلا سيدنا علي اللهم ارضى عنه قال لو كان الفقر رجلا لقتلته
– والله إنك صادق ، على كل حال النا الله
– والنعم بالله ، هاتي هالغطا خليني انام احسنلي ، ومثل ما قال المثل :” إن كثرت همومك ناملها ” وغطيني يا صيته .
