حد فاهم شي
علي الشريف
يحكى انه عصفور باليد ولا عشرين حبة فياجرا تحت القبة … والرفع شغال على ودنه ..ومن طلب العلا سكر الليالي … ومن حشا الكوسا لف الدوالي….
وفي مثل اخر … طب الجرة على ثمها.. بنكسر ثمها…ويا طالب الدبس … ويقول الشاعر الكبير في معلقته البائية….بوس الواوا خلي الواوا بح…والجيبة صارت بح… واللي بحكي الحكومة مش منيجة هو المش منيح ….والله والقدس والوحدات عربية…واحنا كراسي البلد وطاولاتها….وكبارها…وتلولحي يا دالية …وحيطنا مش واطي وطل النشمي من الخندق ..وترامب عنصري ومجنون .. والميزانية مخزوقة ..والعجز بعجز …وقادمون يا اسرائيل ….وتسقط ايران…ويعيش الخليج من الخليج حتى الخليج..
الاسعار رخيصة والطبقة المتوسطة لن تتاثر رغم اختفائها ..وخلصنا من الفساد الاكبر وبدنا نبلش بالاصغر … والشعب راضي ..واهم شي الامن والامان ..لا عنا بلطجة.ولا سرسرة ولا زعرنه ..ولا القوي بوكل الضعيف والحمد الله تناغم كبير مع الحكومة …والتناغم اكبر مع مجلس الشعب ..
اعطونا بريزة واخذوا بريزتين والبنزين مضر بالصحة والخبز بعمل سرطان والدخان مفيد للرئتين … والسردين مدعوم والبو ليبيف والاوكتان صار نوعيات واصبح هو مشروب الضيافة ..للجميع…..
مؤدبون حتى العظم والبسة بتوكل عشانا … واللي بنتقد ما اكتبه يعذرني لاني فقدت القدرة على كل شيء …واللي فاهم شي يفهمنا اياه .. تعيش الحكومة يعيش الرفع يعيش مجلس الشعب تعيش الفياجرا بيضت وجوهنا الله يسود وجهها ونسقط نحن ..نسقط نحن…نسقط نحن.
