كل شيء مغشوش حتى الزفت
كل شي يا صاحبي صار» تقليد ومغشوش»..لا الشفايف شفايف ولا الشدوق شدوق ..يرحم أيّام زمان..كان الواحد يشوف حالوا عَ الأصلي ومش عاجبو العجب ..بس خلينا : إحنا إللي نستاهل ..،، مش إحنا إللي عملنا المواصلات شعبطة وسميناها ( تمرين الصباح ) ..مش إحنا إللي صنعنا الأزمة في كل خرم في عمّان وبررناها (عشان تقدر تشوف أكبر كميّة من الناس ومصير الحي يتلاقى ) …مش إحنا إللي لما طلع السم في أكلنا قلنا (دوخة زغيرة ولا قولة الله يرحمو)…؟؟ مش إحنا وإلاّ لأ ..،، إحنا إللي زيفنا الأشياء ..ولبسناها عَ الشالح : وصارت كل يوم تغري فينا..إحنا إللي جينا عَ الأصيل وأنكرنا أصله وقلنالو روح لاطش بالحياة ..
أنا مش زعلان من هيك …أنا كل زعلي على الزفت .. ما دام حياتنا زفت بزفت ..ليش يروح الزفت الحقيقي و يخلولنا الزفت التقليد أو المغشوش..تعبتْ وأنا أدوًّر على طريقة ألقى فيها زفت أصلي ..لأنو والله مصيبة إنك تكون تتعاطى المغشوش حتى لو كان زفت ..صح وإلاّ لأ ..،، أنا من جهتي ..لا أرضى عن الزفت الأصلي بديلاً ..وإللي حاب يتزفت معي يا مرحبابو : وإلا مش حاب ( مع ذيلها ) ويروح يدوِّر على زفت مغشوش يتزفت فيه ..،،
يعني تخيلو بعد كل هالعمر والمطاردة وراء هيفاء وهبي ..وبعد ما كان الواحد يلغي أربعة خمسة مواعيد وما يرد على التلفون لما تطلع ..وما يشوف (مَرَة) غيرها ..تخيّلوا تطلع هيفاء ( مش مَرَة ) تطلع زلمة عاملة حالها ( مَرَة ) ..أي والله لأنجن ولينجن معي ثلاث أرباع إللي يعرفوها..( طبعاً الربع اللي ظلّ منجن من الأصل ) ..،،
ولحد هون وبشحط بريك ..لأني حاس والله أعلم إني ( خربطت أبلًّشْ)..بس هذا ما يمنعني إني أناشد المسؤولين إنهم يرجعونا لأيّام الزفت الزفت ..ويبعدوا عنّا الزفت إللي مش زفت : إللي مزحلقنا عَ الفاضي…،،
