مستشفى هداسا بالجميد البلدي..
د.فلاح العريني
وأنا قاعد بالدكان، اجا لعندي الحاج ابو علي (اعتقد ماحج ولا وصل مكة، بس احنا متعودين اي واحد براسه شيب بنحكيله ياحج، واي واحد معه نمرة حمرا مكتوب عليها مجلس نواب، بناديه سعادتك)، سويت لأبو علي كاسة قهوة العميد واعطيته اياها..
بلشنا نسولف في المربعانية وكيف الجو شرقية وغبرة وبرد ومافيش مطر، وطلعت انا وياه بنتيجة ان هذا غضب من ربنا علينا بسبب افعالنا وانتخاباتنا وبياناتنا الحكومية وكذباتنا النيابية..
المهم ابوي علي بحكيلي:
ياعمك وين ودي الاقي لبن جعاجيل (جميد بلدي)، حوف زين وكويس؟
والله ودي حوالي عشر ترطال (الرطل ٣ كيلو)، بدي اياهن مونة لهادار، بس اهم شي ياعمك تكون حوَّافته شاطرة ونظيفة، لانه جيل هالوقت قليل بيعرفن يسوَّن لبن، اللي مثل امي وامك راحن الله يرحمهن.
ياحج ليش انت مبطل تسوي لبن جعاجيل في الدار؟
خابرك كل سنة بتفطم البهم بدري وبتحلب الشويهات وبتسوي سمن ولبن وبتبيع.
الحج: لاياعمي مابطلت، بعدي بخلي الحرمة تسوي وتبيع، وعندنا لبن كثير، الساعة لبن العام (السنة الماضية) ماخلص، من خير الله ومن خيرك كلشي وجاد.
طيب ليش بدور لبن ولبنك عندك؟
والله لخمتني ياحج، خفنك مطلق ماتذوق حوف امي علي؟
الحاج: له ياعمك، على سلامتها ام علي، بس والله بدي لبن يكون حوف احسن وارتب، بيني وبينك فيه ناس شاطرة بشغل اللبن، احسن من ام علي، لان ام علي الحين تلفانة ومافيها مروَّة زي أول.
يعني ياحج اللبن اللي بتسووه في الدار هذا للبيع، بتبيعوه عالناس على حساب الرطل ٣٠ نيرة، وانت الان بدك لدارك لبن مرتب احسن من لبنك؟
واكيد بدور بسعر اقل من ٣٠ نيرة؟
الحج: يعني لغاية ٢٥ زين ومليح..
ااااااخ ياحج..
عليت قلبي على هالصبح..
بتعرف انك ياحج ذكرتني في الحكومة الاردنية؟
قولي: كيف؟
الحاج: كيف؟
الحكومة بتسوي لينا مستشفيات بتشبه لبن ام علي، يعني حوف مش ولابد، وبتصير الحكومة تعالجنا في هيك مستشفيات، وهي بتروح تتعالج في مستشفى هداسا، لان الحوف كويس، احسن من حوف حكومتنا..
الفرق ياحج بينك وبين الحكومة، انك انت صادق، واعترفت ان حوف ام علي مو مزبوط بحكم انها تعبت وشقيت وماعاد فيها حيل، اما الحكومة مش راضية تعترف انها عجزت وماعاد همها عالوطن ولا عالقطاع الصحي في البلد..
بعدين ياحج اذا انت مش واثق في شغل ام علي ولبنها، وانت عايش معها عمر طويل يمكن اكثر من عمر الحكومة الاردنية، كيف بدك ايانا الشعب نثق بالحكومة ونوخذ اللقاح؟
والله ياحج لافيه ثقة في حوف ام علي ومريساتها ولاثقة في بيان الحكومة ولقاحاتها..
عارف ياحج متى الوطن بكون بخير؟
بس انت توكل من حوف ام علي، والحكومة تتعالج في مستشفيات الوطن وتترك هداسا..
او ان الله سبحانه وتعالى يوخذ ام علي وتتزوج وحدة ثانية تعيد الك شبابك وتكون شاطرة بحوف اللبن، وان الله يخلصنا من هيك حكومة ويجيب للوطن حكومة وطنية تعيد اله خيراته ومقدراته اللي حلبتهن هاي الحكومات..
ياحج غيِّر ام علي وغيِّر حوفها وراح ترزق، ولاتقول مافيني حيل وختيرت، لا ياحج انت لسا شباب، خذ لبن ام علي واطلع على هداسا بيعه هناك لحتى يعالجوك..
طبع ياحج طبع، بس خذ معك سمن بلدي على هداسا، خلي ريحة السمن والشيح والبعيثران تروي ارض فلسطين ياحج..
طبع ياحج بس خلي الخليل تستذكر سمن الطفيلة، خلي الخليل تبعثلي معك سلام ياحج..
طبع ياحج، بس ارجعلنا زلمة وخلف النا اولاد وبنات، بدنا جيل جديد، جديد ياحج، يعرف قيمة الوطن اللي احنا بعناه، الوطن اللي راح اليوم نكمل عقد بيعه عن طريق منح الثقة لحكومة دواها في هداسا..
خلِّف ياحج خلِّف، اللي خلقهم بعيشهم، رطل الريفانين بهداسا ٢٥ شيكل، وعندنا رطل اللبن ٣٠ نيرة..
ملاحظة: اي كلمة تحتاج لترجمة خبروني، حتى ابحث عن مسؤول قلبه عالوطن لسا متذكر لهجتنا.
#التطبيع_بدون_شيح_وبعيثران_خيانة.
#فلتسقط_كل_البشائر_يابِشر
#د_فلاح_العُريني
#Dr_Falah_Alorainy
