محمد عياش القرعان
_يزم صحيح انت شو بتشتغل بالزبط؟!!
_بشتغل #سولفجي
_عفوا شو بتقول؟!🤔
_يزم بقولك بشتغل سولفجي، انت ما سمعتني شو قلت؟!
_والله سمعتك بس هاي اول مرة بسمع بهاي المهنة…شو يعني سولفجي، ممكن توضح أكثر؟!
_يا اخي انا بالمختصر شغلتي بتتعلق بالحكي بس… يعني انا شغلتي خطيب…انا مثل ما انت عارف الله وهبني اني بعرف اصفًط الحكي هيك من الله، وانا كمان اشتغلت على حالي كثير وطورت موهبتي بانه تدربت ومارست الحكي قدام الناس، والخبرة كمان الها دور كبير بهيك أمور، وكمان أنا مشان أعزز قدراتي حفظت كم آية كريمة وكم حديث نبوي وكم بيت شعر بتتعلق بالمناسبات،
وبعدين محسوبك صرت لبلبلة بالحكي..بس مش لبلبلة الممثلة تبعت عصابة حمادة وتوتو هههههه ترى بمزح معك 😃؟!
_ايوه أيوه هسع فهمت عليك، انت اللي كل مناسبة وجاهة خطبة او عرس وصلحة عشائرية وافتتاح محل او مؤسسة وهيك اشياء بنادوك مشان تحكيلك كم كلمة افتتاحية قدام الجمهور، لانه اكثرهم ما بعرف يحكي كلمتين على بعض، وانت ما شاءالله عليك شاطر وحكواتي ومسحوب من لسانك، وسوقك شغال كويس هاي الايام خاصة انه وسائل التواصل الاجتماعي بتصور وتبث كل شاردة وواردة، ويا حبيبي والله شغلتك حلوة كثير خاصة للناس اللي قاعدة والفاضية أشغال وما عندهم بضاعة غير صف الحكي والسوالف🤔
_اه تشيف لعاد هو انت بتفكرني قليل يزم!😃
آه صحيح بعدين شو رأيك، امبارح شفت محسوبك كيف كانت خطبتي بجاهة عرس الولد ابنه لابو خليل الكرزم؟!!
_بدك الصحيح ، شفتها أما شو اشي برفع الراس، وبيني وبينك تمنيت اصير محلك، بس أنا لساني ثقيل لما بحكي قدام الناس بحس تقول وكأنه فيه عيارة ام خمسة كيلو…وعربيّاتي مش كثير، وبس أطلع قدام الجمهور بنهتر وبصير ألاخم وبنسى شو بدي اقول ؟؟🤔
_يزم هاي بتصير مع اي واحد بطلع أول مرة بس بعدين بتروح مع الايام… واذا حاب عنجد تتعلم تعال رافقني، اني بكل مناسبة اجتماعية بنادوني مشان احكي، صرت علم ومشهور…
ما انت فاضي لا شغلة ولا عملة، انت بس راقبني وشوف شو أنا بعمل، ومرة على مرة بتتعلم…صدقني اني كنت مثلك بالاول بس بعدين بتروح منك رهبة المسرح وبتصير لبلبلة أكثر مني.
_معقول يا ناس اصير اعرف احكي قدام الجمهور؟🤔
انداري والله بجوز الرئيس اليمني المتسردب عبد ربه هادي منصور يصير يعرف يحكي واني ما اعرف…لا صعبة علي كثير؟!🤔
يزم اني عارف حالي اهتر، والله صعب ما راح اقدر…!
اقولك خلص باجي معك ، بس خليني اظل ماسك المايكروفون تبعك وقاعد بجنبك عشان اظل اطلع بالصور والفيديوهات …عبو الصحيح شغلة مسلية كثير🤔
_خلص ماشي مثل ما بدك يا صديقي، انت حر.
_صحيح بالمناسبة نسيت أسألك ، انت شو بتستفيد من هاي الشغلة..يعني بيها مصاري؟!
_لا مافيهاش مصاري… بس كل شي مأمن ولا بتدفع من جيبتك قرش… وفيها وجاهة وعز وبتتعرف على ناسات كثير وبتعبي فراغك…وبعدين بتظلك تنبط من المناسف والحلويات تا تستوي🤔
_اها هاه لعاد قلتي ليش.. هسع عرفت شو سر الكرش تبعك، واللي بشوفك بقول عنك تقول انك مرة حامل بشهرها التاسع؟!🤔
والله يا هنيالك ياعم….خلص اعتبرني مساعدك ورفيقك من هون وطالع….اني مثل ما انت شايف معصعص من الضعف🤔
_خلص تكرم، وصلت، هاي بسيطة
_اشكرك صديقي