سبحان الله
نهيل الشقران
والله هالكورونا الها فوائد كثيرة ، ويا خوف قلبي انها عقاب من الله ، ورفض لأعمال بعض الناس
أولا : كان الناس يقطعوا الأرحام وناسيين خواتهم وقرايبهم وحتى أمهاتهم ، صاروا اليوم يتمنوا لو يقدروا يصلونهن بس الحضر منعهم ، بستاهلوا
ثانيا : بعض الناس كانوا ماخذين الحج والعمرة رحلة وتجارة ، وسمعه وبهرجه، يلا هاي ربنا سبحانه بعالي سماه ، سبب الأسباب وما حدا قادر لا يعتمر ولا يحج ، والله كأنه ربنا ما بده عبادة بعض المرائين
ثالثا : ربنا أنصف النسوان اللي ما كانن يشوفن ازواجهن طول النهار ، كانوا بالشغل ، وبالليل يا بلعبوا شده ، يا بروحوا عالفنادق والمطاعم وهن مرميات بالدار تقول قطعة اثاث
رابعا : ونتن يا نسوان كمان ، كانت الوحده منكو كل يوم تجيب اكل جاهز ، وما تكلف حالها تطبخ لولادها ، هاض اذا كانت بتعرف تطبخ ،،، هسا انجبرتي تتعلمي الطبخ هههه
خامسا : لا تنسن غسيل السجاد ، كان كله عند دراي كلين ، اغسلن هسا وتوكلن على الله .
سادسا : وانت يللي عندك اربع وخمس سيارات حديثات ، وكانوا ولادك وبناتك يشفطن فيهن ، هاي هن واقفات بالكراجات ممنوووع يتحركن
سابعا : سبحان الله ، يا جماعه كان الزواج فقط مجرد اشهار ، مش صالات ولا نسوان كاسيات عاريات ، ولا زغاريت …. سبحان الله رجع العرس لأصله إشهار وبس ، راحت عللي كانوا يروحوا يتفرجوا عالنسوان
ثامنا : انت يا الغني اللي كنت تلبس كل يوم طقم شكل ، هاي محلات الالبسة سكرت ، وبدك تنجبر تلبس الطقم مرتيييين وثلاث .
تاسعا : ونتو يا الشباب اللي منكم كانوا يفطروا رمضان وطول النهار بالكافيهات عالاراجيل …. هيها سكرت لا تفرحوا
عاشرا : هيه انتن يا نسوان يللي كنتن من بيت لبيت ، غيبه ونميمه وحكي عالناس …. ع قولة المثل : اجاك يا بلوط من يعرفك … اقعدن وانضبن بدوركن ممنوووع الطلعه في حظر
حادي عشر : يا ريت وبتمنى تكون كل النسوان مثل امي ، ليش ؟؟ لانه ما تغير عليها شي ، من زمااان بتطبخ وبتغسل سجاد بايدها ، وما عمرها فكرت تشابه ولا تقاهر حدا ، وبتعبد ربها ومداومه ع صلاتها ، ربي يحفظلنا اياها