#زفة_البلد
وليد عليمات
الزفات ايام زمان .حمام العريس عند بيت ابو فلان .. بعدين الزفة .من بيت ابو فلان لبيت ابو العريس .. في واحد #متسلق شايل الشمسية ورا العريس
في واحد #سياسي شايل القربة .. ويلحن .. وعكيفه يختار الهتافات
… في شباب مختصين ب #التسحيج والرهز والغنا .. بكونوا صفين .. صف #إئتلاف جنب العريس … وقبالهم صف #معارضة يمشي ل #ورا .. قايد الزفة
واحد #اعلامي شايل الطبلة ..وماشي والناس ماشية وراه ..
في واحد بالنص . #متنفذ . يقود بالهتافات … وكل ما يوصل عند بيت .. (هون فرطت مسبحتي … هون لمولي اياها ) …ولما يوصل عند بيت حبيبته و #مصلحته… اذا كانت عالسطح .. يهتف (يللي فوق يلي فوق .. ارحم حبيبك يللي فوق ) …
اذا كانت جوا البيت (هون واربط باب الدار .. تا تطلع بنت المختار ))
.في واحد حزبي #أطرش .. ماشي ويزقف ومش فاهم اشي
.
في ناس . #عاطفيين . كل ما يوصل عند بيتهم .. يرموا ملبس عالزفة …في ناس #استفزازيين يرموا الملبس عمدا على روس #الزفيفة
في #اولاد متحمسين دايرين حولين الزفة يلموا ملبس …
..
ورا الزفة ..زفة نسوان .. بدون العروس .. فيها سبعين اغنية متعارضات
في شعب #مش_معزومين ماشيين ورا الزفة … عسى انه يصحلهم حبة ملبس ضايعة صدفة
.
في شباب واقفين ورا العريس .. يمدوا ايديهم يعملوله شغلات #مش_حلوة .. #هظول احنا
.
(لاقينا يا ام العريس …جبنالك .. #هظاك عريس)
.
.
تنتهي الزفة ..( العروسة للعريس .. والجري للمتاعيس )
كل واحد يروح باللي اجا فيه …
يخلف على اللي نقط واللي ما نقط
..#وليد_عليمات
