رفع
صباح الخير جدوه , هذه تحية الصباح من خلف لجده المختار . خلف طالب جامعي وعلى أبواب التخريج من كلية الإقتصاد والعلوم الإدارية . فيرد جده قائلاً : والله ويا هلا بالغالي إبن الغالي , هلا بحبيب جده , تعال أُقعد بحذاي يا بعد جدك . فيسأله خلف : شلونك جدو وتشيف حالك , والله اشتقت لقعداتك وسوالفك الحلوة .
يُسنتر الجد مسند القش بينه وبين حفيده ويسحب سحبة من سيجارة الهيشة ويقول : آه يا جدوه وشّو أخبار قرايتك وين صرت؟
فيجيبه خلف : عن قريب بتخرج وبهج من هل بلد .
الجد مُستنكرا : ومالها هل بلد ؟
خلف : أنت يا جدي مش شايف شو إللي بصير فيها ؟!
الجد : ومالها والله أحلى من هيتش بلد ما بتلاقي .
خلف : جدوه إمبارحيات قررت الحكومة رفع أسعار البنزين والكاز وشغلات كثيرة
الجد : وما يرفعوا , هاظا شغلهم وهم أدرى بيه
خلف : يا جدي يا حبيبي مهو لما ترتفع الأسعار الناس بتوكل هوا وبتبطل تقدر تصرف على حالها .
في هذه اللحظة يستند مثقال وينظر لخلف بنظرات إستنكارية ويقول له : ولك يا إبن سليمة ما بدك تبطل طخ على الدولة , وبعدين أنت وشّو مالك ومالهم شغلهم وهم أدرى بيه , دخلك بدي أسألك هم بوكلوا وبشربوا من عندك؟ فيرد خلف : آه كيف لعاد , مهو المصاري اللي بدهم يوخظوها راح يوخظوها مني ومنك . وهنا استشاظ الجد غضباً ورمى عُلبة التتن على طول يده لتنتثر أوراق الأوتو مان مع التتن في أرجاء الغرفة وهو يقول لخلف : قوم إنقلع من عندي , يلعنك ويلعن أبوك ويلعن أبو أبوك . ولك انت واحد فِتني , أي عليّ الجيرة أنت واشكالك هم إللّي بدهم يخربوا هالبلد .
يرد خلف وهو يضحك : الله يسامحك يا جدو .
الجد : الله لا يسامحك , ولك أني عارف كل سوالفك هاي من ورا خوالك وأمك إللي عاملة حالها مثقفة , ولك أني مختار وكل الناس بتوجبني , تا تيجي أنت وتخرب سُمعتي بالبلد . ولك بكفي يوم أروح أراجع بأي دائرة بس أعرفّهم بحالي واحتشيلهم أني مختار الكل بوقف وبظرب لي سلام . تا تيجي أنت يا نص نصيص وتصير تنظّر علي بتالي هالعُمر . لكن الحق مش عليك . الحق عليّ أني إللّي بوخظ وبعطي معك بهالسوالف المعثثة , قوم إنقلع من خلقتي .
يختصر خلف اللقاء ويخرج من ديوان جده وهو يبتسم ويقول : الله يسامحك يا جدوه
