بسم الله الرحمن الرحيم
عزيزي المنخفض . خلي العقل منك
من كوكب زحل اتصل بي طحطح قلقا فزعا يسالني شو في بالاردن يابو ركان ؟.شو في يزم ؟؟؟ مالكو قيامتكو قايمه وصايبكو الخابط اللابط ؟؟
اسكت ساكت يابو الطحاطيح مش المنخفض صار عالابواب
وحد علمك احنا شعب بنحب الاكشن وبنحب الحركه بنحب نتحدى الملل. يعني برضيك يا طحطح انو يجي المنخفض بدون هيزعيه ؟؟ بتقبل يجي البعبع الابيض واحنا نايمين بدورنا ؟؟ اكيد كلا
اكثر جزء بنحبه يا طحطح هو الهجوم عالمخبز .. بنكيف يا اخي . بننشكح .. بنحس حالنا بنمثل فيلم اكشن من تبعات (اميت باتشان ) بنفوت عالمخبز والقناوي معنا وبنشتري شوال خبز وشوال كعك وخبز حمام لا تسالني ليش ؟ لاني بعرفش بس شكلو الادرينالين بنط معانا اعلى من السكري لما نسمع (طاري) الثلج .بنط لدرجة انو بنشتري كمان خبز (طوست ) مع العلم انو ما بناكلو وما بنعرفو ولا يربطنا به اي روابط تاريخيه او اجتماعيه ولا بنشوفه الا بالتلفزيون بدعايه ( ابو الولد )وبالرغم من ذلك بنشتريه وبالاخر بنكبو …عادي
وبعدين يا طويل العمر بنهجم عالكازيه . وبنبلش نعبي
بنعبي اي اشي مش مشكله
يعني لو الكازيه بتبيع كولا بنعبي كولا عادي .. وممكن تلاقي واحد قاعد بتهاوش على دور الكاز وهو اصلا معندهوش صوبة كاز ياللروعه ..قلتلك (الادرينالين) يا خوي يا طحطح .. اه من الادرينالين بس
واما قمة المخمخه ونكشة المخ يابو الطحاطيح فهي عند بعض المواقع الاخباريه المغموره اللي بتطلعلك على ابو غفله وبتصير بدها تنزل سبق اخباري خاوة وبتبلش تطخلك اخبار chذب بchذب وبتصير تحلف بشرفها وعرض خواتها انو هاظ المنخفض اقوى منخفض من ايام حرب الشلاليت ايام كان الطهور عض تبا لادرينالينا . والله شكلو مضروب ههههههههه
لا والاخ بصير يصرح مثل اللي عنجد انو البلد رح تتكركب وتتخربط وانو ضحايا الننخفض رح تكون بالالاف … الله لا يوفقك يالبعيد
المهم يا خوي يا طحطح اخر شي المنخفض بكبر راسو وبقوم بلف وبرجع وبقولك شو هالمهاليع هظول . هو انا ناقص .
الاخ المنخفض بفكرنا مهلوعين بعرفش انو احنا جماعه بطرانين و بنعمل هيك من باب الزهق بس .
طحطح …صحيح انت شو خصك ؟؟
منخفضنا وحرين فيه .. اطلع من راسي
