#الدبّيك
#سواليف الإخباري/ أحمد حسن الزعبي
مقال الأحد 19 / 2 / 2023
حمل #ابريق_الشاي ووضعه على غطاء الصوبة ، ثم حرّك رأس #المدفأة يميناَ ويساراً وقال “خلينا نزبّط الراس” ، لم أفهم وقتها أي رأس فيهم يريد “تزبيطه” ، لكنه بعد ذلك “نفخ نفخه” تنم عن قهر وغضب ..سألته :
– أبو يحيى: يا رجل ولا بقهرني غير لما يكون #مسؤول أو #سياسي وفجأة تلاقيه بعرس قاعد “بنط وبدبك” والله ما هي لايقة وبتقلل هيبته..
ضحكت طويلاً ،وقلت له حجّي صلّي ع النبي : همّ بدهم إياه أصلاً دبّيك ، لو مش دبّيك ما وصل للمنصب اللي هو فيه ، انت بتعرف قدّيش مواصفات الدبيك مهمة بالسياسة ، عدّ على أصابعك : لازم يكون عنده ليونه عشان يطلع وينزل ويقرمز حسب النغمة ، الدبيك المحترف بيضبط رجليه مع رجلين الجماعة لو خربط بطلعوه برّة الدبكة ،بمشي حسب نوع الأغنية ، الدبّيك هو اللي بيحيي العرس وبين أنه عرس مهم، الدبّيك قادر أن يدبك على أي أغنية ما عندهوش تحفظ على شيء ، يقوم بتنسيق حركة رجليه وجسمه مع “دقيق المجوز” وضارب الطبل ولا يمكن أن يدبك دون وجودهما ، الدّبيك مش ممكن يحرّن أو يطلع عن الصف الا اذا خلص العرس وحكوا له ارتاح شوي ، الدّبيك بيرضى بأي شي كاسة شاي صحن كنافة كلمة مديح لأنه الدبكة بدمّة ..أحياناً بشبك ع الدبكة مع شخصين فقط ولا يشترط وجود دقيق مجوز أو ضارب طبل أو عازف قربة..مسجّل سيارة كيا سيفيا قد يحركهما للدبكة..عارف ليش خالي أبو يحيى : لأنه “الرقّيص” رقَيص بطبعه”..
نزل الابريق عن الصوبة ..خلينا نزبّط الراس..
#أحمد_حسن_الزعبي
ahmedalzoubi@hotmail.com
