#طنجرة #العدس الكروية / #يوسف_غيشان
زوجان أردنيان في الهزيع الأخير من العمر يتربعان على الأرض في غرفة متواضعة أمامهما صحون فارغة، راس بصل وطنجرة يفوح منها بخار شوربة العدس، الزوج غاضب:
-يا حرمة…كل يوم عدس عدس عدس…زهقت العدس …. ما فيه إشي غيره.
-هاظا اللي عندنا. تقاعدك ميتين نيرة وبدك بقدونس؟؟؟ أنا ما قلتلك تكون موظف نزيه…. أنا ما قلتلك تمشي معاملات الناس بدون ما اتدبر حالك معهم..أنا ما قلتلك تستنى مشان توكل لحمة ومرتديللا في الجنّة، أنا ما قلتلك….
(الزوجة يزداد غضبها فتحمل طنجرة العدس وتسكبها على رأس الزوج)
الرجل مصدوم بينما العدس ينقط من لحيته على الأرض…. تتسع البقعة حتى تغمر الغرفة. يغرق الزوجان في العدس …. يخرج العدس من البيت يغمر الحوش والحارة والحي والمدينة ..يغمر الأردن.
تتسع بقعة العدس فتغمر الشرق الأوسط وتغمر الكرة الأرضية.
مراقب بعيد من مجرة أخرى يرى الكرة الأرضية ينقط منها العدس وبخاره يتصاعد في الأعالي.
