المهم ماتكون حرام ….
من زاوية اخرى (ممكن قراءة الكلمة “اخرى” على عدة وجوه وكلها بتزبط ) انا متاكد ان كل مناضل عربي انتفض على قرارات ترامب بالامس قام بالواجب هذا الصباح ، قام شرب كاسة شاي او قهوة ، مع سيجارتين امريكيات دعم للصهيونية والماسونية (ملعونة الحرسي ) ، ثم قام وادى دوره في دعم مسيرة الصرف الصحي في البلاد ، يعني فكونا من العرط والكذب ، وان الكل بفهم بالسياسة والة نظرة بعيدة المدى وممكن تصل بعد انفة بفتر …..
من زاوية اخرى ترامب رجل يستحق الاحترام والتقدير وذلك للاسباب التالية ، لما ترشح اعلن عن وعود ومنها نقل السفارة الى القدس ، والزلمة وفى وكفى وقاعد بنفذ بوعودة كلها ، مش مثل نواب الشعب الموزمبيقي اللي اشبعونا وعود وخلونا نسحج على الفاضي والمليان وبس فازوا اعطونا اللي بالي بالك ، لا وكمان بنرجع ننتخبهم مرة ثانية ، وبخلونا نسحج للي رايح واللي جاي فقط لاننا شعب محدود الذكاء وردة افعالنا لحظية فقط ….
الرفيق المناضل ترامب حكى رح يدفع الخليج مليارات بدل حمايتهم ، ودفعهم اللي معكوا خبرهن 400 مليار والمخفي اعظم ، حكى رح امنع سفر الارهابيين الهمل من بعض الدول وكمان نفذ واصدر مرسوم من فوق ، الوعد اللي اتوقع رح يطنشة لانة الطرف الثاني مش عربي هو بناء سور مع المكسيك ، واذا عملة انا رح يزيد احترامي لية ( مع انة ولا داري عني حريق هالوالدين )
انتفض العرب (الله يستر) وردود فعلهم زلزلت العالم ( ما شاء الله ) ، لماذا لان ترامب اعلن عن نقل السفارة وان القدس عاصمة لاسرائيل ، طيب قبل اسبوع القدس كانت عاصمة منيعة وتحتوي على عناصر الجيش الفلسطيني لحماية الوزارات الفلسطينية والسفارات العربية ، وكان المناضلين والثوار العرب والفلسطينيين قاعدين بتعللوا على ابواب الاقصى يعني ؟؟؟
القدس تم تسليمها من عام 1967 ! من زمان يعني يا شباب ، يعني بلا عرط وكذب على الفاضي ، وكل مناضل عربي صار يعبر ان الصدمة اكبر من الاستيعاب ( يا كذابين ) كبيرها انة نوقف دقيقة صمت ، مع تغيير للصورة الشخصية على الفيس بوك ، وكل حكومات العرب اللي متصورين انها رح تقودنا للمجد ، رح تقودنا الى لا شيء .
