بصراحة
بصراحة في الحقيقة، فلازم فلافل ،،انه احنا لازم نشكر الحكومة على جهودها الجبارة انها بتعمل تنوع بالاجراءات اللي بتقوم فيها وفرض الضرائب علينا، وما بتخلي المواطن يوخذ راحته ويلتقط انفاسه ابدا، والقصد طبعا خير مش شر كما يعتقد المغرضون وبعض السوداويون وخفافيش الظلام الذين يصطادون بالماء العكر ،،والمي مقطوعة اصلا من اسبوع،، ما علينا،،
المهم الحكومة لما سمعت انه اكثر حالات الانتحار تحصل عادة بالدول الاكثر رفاهية وغنى،، وخصوصا الدول الاسكندافية،، خافت علينا اذا رفهتنا كثير وخلتنا نكيف ،،ووفرت النا كل وسائل الراحة،،ممكن نزهق ونمل ونتجه بعدين للانتحار والعياذ بالله ،،او التوحد او الاكتئآب او الادمان على المخدرات والمسكرات وهذا ايضا خطير ويدمر الشعوب!!!! ،،فقالت يا بنت خليني الحقهم قبل ما يضيعوا مني وينتحروا !! خليني اطين عليهم عيشتهم ، وخلي الخوازيق عليهم يوميا، وكل ما يطلعوا من خازوق بفقعهم خازوق العن من اللي قبله، مشان ما يزهقوا ويملوا من القعدة وكثر الرفاهية بدون خوازيق، ويصيروا يفكروا بعدين بشغلات عاطلة مضرة بالصحة والوطن على حد سواء!! او ممكن ينتحروا لا سمح الله، وانتوا عارفين انه الحكومة بخافوا الله كثير ودايما بتستعين بالشيوخ “الكبار” عند كل مفرق او منعطف خطر تتعرض له البلد …. واكبر دليل شوفوا التلفزيون الاردني دايما بستضيف الشيوخ الكبار بالمناسبات الوطنية المهمة !! ،،واكيد هم نصحوها وما بقصروا بهيك شغلات الله يخليهم،، انه الانتحار حرام واللي بعمله بروح دوغري للنار بدون فيزا! ، وكثر الرفاهية وتدليل الشعوب بالعادة يؤدي الى خرابها ودمارها واندثارها في نهاية المطاف !! ….وكما يقال “ان دولار وقاية خير من كيلو عوامة، عفوا قصدي كيلو وقاية” او كما تقول القاعدة الشرعية ” ان درء المفاسد خير من جلب المصالح”
وهاي الدليل قدامكوا،،انه حالات الانتحار عنا وعند دول العالم الثالث ونص وخمسه،، اقل بكثير من الدول الغنية !! وهذا يؤكد ما ذهب اليه الحكومة !!،،، وهاظا هو قصد الحكومة من كل هالعملية ،، فهمتوا ليش هسع هي بتعمل هيك ؟.!!
وسلامتي !!
