بس لا تجرح حساسي
رئيس الوزراء – الله يطول بعمره – يدرس رفع الدعم عن الخبز وفرض ضرائب جديدة على المياة والكهرباء اذا لم يحصل الأردن على مساعدات مالية عاجلة من المملكة العربية السعودية ودول الخليج ، ونائب رئيس الوزراء للشؤون الإقتصادية جواد العناني – اجى يكحلها أعماها – عندما صرح بأن الحكومة مضطرة لاتخاذ اجراءات لخفض الدين العام .
ارفعوا اه معلش كيسنا بيتحمل ، نحنا شعب ما بينعطى عين ، يا رئيس الوزراء عادي دولتك احكيها على بلاطه بمؤتمر صحفي وفش غلي :” لقد رفعنا الدعم عن الخبز والرغوة عن كاسة القهوة وياللي مو عاجبه يبلط البحر ، رفعنا ضمة الفجل وعمره لا حدا أكل فجل ، من بكره يا شبابنا الأردني شفرة الآستور بدينار لانه مش شرط تحلق لحيتك كل يوم ، من الآن وطالع ممنوع مواطن أردني يشتري هريسة لأنو الحلويات رفاهية واحنا ناويين على التقشف ، طفوا كهارب الدرا واغسلن يا نسوان على اديكن ، روحوا على الدوام مشي بدل السيارات ، انتوا شايفين الوضع كيف والسعودية مثل الاولاد الصغار بطلت تعطينا مصاري ، خلص خليكو زلم واستعدوا للتقشف وبدناش حد يحملنا جميلة “.
يا دولة الرئيس كوني مواطن صالح وبحب الوطن بحكيلك وأنا بكامل قواي العقلية وعيب عاللي يبطل : خذ راتبي بس خليلي منه ٦٠ دينار للدخان وليرتين للبنادول والاسبرين ، احرقني واستخرج نفط من جثتي الهادمة أنا فدا للوطن ، أقلك تعال علينا على الدار أو ابعث العناني والله لأعطيه خواتم جدتي ومهباش جدي وساعة أيمن ” بدها بس بطارية ” وطبق البيض وابريق الشاي الكبير وتنكتين زيت وشوال الرز ” الله وكيلك تايجر ” وبنطلوني الكتان الأسود وعلبتين طون أصلي وبكسة كلمنتينا ” صح حامضة بس بلدية ” ، يا دولتك خذ كل شي انا مش محملك جميلة لا والله بالعكس هذا واجبي كمواطن ، يا سيدي من الآخر اذا فيه حواليك عالم بيشتروا عبيد بيعني وبعتبر حالي من الحبشة ، أعطي نص ثمني للمسؤولين ما عدا ناصر جودة لا تعطيه حرا انا واعطي الحج اجديع خمس ليرات دين علي للدكانه والباقي حطه بميزانية الدولة ” مش تسرقوه ” ، بس تبيعني فاصل علي مش تفكرني رخيص وتبيعني بحال البلاش ، لا خلي عندك ثقة بعبوديتي واحكيلهم هذا هو العبد ياللي ما بقول آخ مين يزوّد ، أنا بين ايديك دولة الرئيس أعمل ياللي بدك ياه لعيون الوطن بس لا تجرح حساسي .
عودة عياصرة
