حوار اسري بنهج وطني..
د.فلاح العُريني
كنت أتعامل مع أبنائي كأب لا يخطئ، وكل سلوك من أبنائي اعتقد إنه خطأ اقنع نفسي بهذا الخطأ وأعاقب المخطئ، فأنا الأب وعمود البيت الذي إذا سقط سقطعت اركان الأسرة معه..
تبرير الإبن لفعلته كنت اعتبرها عقوق بحقي، فلا يجوز له أن ينكر اي تهمة اوجهها ضده، كنت اسمح لهم بحرية التعبير حسب ما اراه مناسبا، فمثلا في حضرة اصدقائي يمكن لأبني أن يسأل الضيف:
كيف بتحب القهوة عموه؟ حلوة ولا وسط ولاسادة؟
بس مابطلعله يحكي للضيف:
كيفك عموه؟ اخبارك؟
اذكر ذات مرة لؤي اخذ سيارتي الكيا دون علمي وعمل حادث بسيط، فقبل أن يعترف وبخته وانبته حتى اضرب عن الطعام، ولم اكلف نفسي بمراضاته، فهذا يعتبر انتقاصا من سيادتي على البيت ولربما يؤدي ذلك إلى تمرد قيادات أخرى في البيت خصوصا الزوجة خط الهجوم الأول..
فليس أنا ممن يقدم تنازلات لأن اي تنازل لايصب في مصلحة الأسرة..
كنت أختار لهم تخصصاتهم وعدد الساعات في كل فصل، حتى إني الان مفكر اختار الهم زوجاتهم، ومن باب الاحترام عليهم تسمية ابناءهم مستقبلا حسب رغبتي، فلايمكن لزوجاتهم التدخل بهذا الشأن، فالمولود يحمل اسم ابيه وليس امه وعليه انا من يسمي الحفيد..
نعم ياسادة..
عندي دستور أُسَري اسير عليه ومخلصا له دون أن اقسم بالله على كتاب الله..
الجميع في البيت يسعى لأسعادي لانهم يظنون ان التعاسة ستسقط عمود البيت، لذلك لم يخبرونني عن اي شكوى او تذمر..
كيف العيال يامرة؟
كله تمام ابو قصي، شو بدهم اكثر من انه الله يديمك فوق روسهم؟
ياسلام..
فعلا مادام انا موجود وحامل همهم شو بدهم اكثر من هيك؟
اصلا شو عرفهم بمصلحتهم؟
اللي اكبر منك بيوم افهم منك بسنة،
(اااااخ بس)..
كنت احس ان السعادة بالضبط والربط على طريقتي ولا أؤمن بالمشاركة ابدا.. (العب وحدك تصبح راضي)، حتى بعض المصطلحات كنت انكرها والعنها واندد بها..
الجندرة وما ادراك ما الجندرة، فليس للمرأة الا البيت، وخدمة اطفالها، وممنوع تناقش لانه اصلا ماعندها قضية تدافع عنها..
يمنع على الاسرة الحديث عن مفهوم التشاركية، يعني العيال مايكونوا الهم اصدقاء، والحرمة ممنوع تقعد مع جارتها، فمصلحة الاسرة تتطلب قطع العلاقات مع الجوار..
حقا كنت سعيداً..
ذات مرة جاءت والدتي اطال الله بعمرها، وطلبت مني وبلهجة شديدة وبخطى واثقة ان افتح قنوات حوار مع افراد الاسرة ولو شكليا، لانهم حابين يحاوروني ويوخذوا مني الحكم والقول السديد، لاني مفهمهم اني الوحيد الحكيم في البيت وصاحب الحل والعقد والا كيف اصبحت صاحب ولاية عليهم..
اصرت الوالدة على طلبها، ولولا انني اعرف حبها لي لقلت ان هنالك مؤامرة وتحريض منها ضدي، ولربما نسقت مع وزارة الداخلية في البيت على سحب البساط من تحت اقدامي، لكنها أمي اعرفها لاتخون ابنها ولاتهدف في مسعاها الا لحياة كريمة لاسرة هي جزء منها بل هي قلب الاسرة النابض..
وافقت على فتح قنوات حوار مع الاسرة وقلبي غير مطمئن، شو قصة هالاصلاح اللي امي طالعتلي فيه؟
ما احنا داحلين والحمد لله والامر تحت السيطرة، والجوار داعم لسياستي المباركة..
امرك يمة والساتر الله..
بكرة راح افتح قنوات الحوار مع الجميع، تحت طائلة المساءلة، فالمصروف بيدي، والسيارة ملكي، والاثاث من تعبي، يعني خليهم يفكروا منيح قبل أي كلمة يحكوها..
بعد مشاورات اخبرتني أمي ان غد الجمعة العصر كونه حظر راح نجلس على الدائرة المستديرة (جنابي اسفنج بشكل دائري) ونبدأ الحوار، وبحضور الوالدة كمراقب دولي(شطي البيت)..
اجتمعنا وبصراحة لولا وجود الوالدة التي تمثل مجلس الاسرة الدولي لجعلت الحوار خوارا..
جلسنا..
من يبدأ؟
من يبدأ؟
بدأ المعارض قصي:
يابا بس اطلب منك مصاري بتحكيلي شو بدك فيهن؟ ما انا بصرف عليك.
يابا خليني ابيع عندك بالدكان بطاقات خلوي لحسابي وهيك انا بمشي حالي والزيادة بدعم فيهم خزينة الاسرة..
بصراحة عجبتني كلمة (بدعم خزينة الاسرة).
فعلا العيل اقنعني، ويش عليه لو دعم هالخزينة البايرة؟
اااه اللي بعده..
سولف يالؤي:
يابا انت بهدلتني لاني عملت حادث في السيارة..
انا اخذت السيارة حتى اتدرب سواقة لاني بعرف مامعك مصاري تدفعلي ادرب، وقلت بدرب على سيارة ابوي ومابخسره ولاقرش وبقطع رخصة وبصير اخدم ابوي بالسيارة (والله يابا نعمل لاجلكم ونأسف على ازعاجكم)، واذا هاي المرة صار معي حادث المرة الجاية بتعلم..
والك ياولد ليش ماحكيتلي هيك؟
يابا هو انت فتحت لي مجال احكي؟
انت قمعتني يابا ودمرت نفسيتي وتمنيت لو الله ماخلقني يابا..
يابا انا حرمت ركوب السيارات على يدك..
يابا انت رجل قمعي واحنا بنحبك يابا والله بنحبك بس انت مو داري عن حبنا الك..
ليش يابا تعمل هيك معنا واحنا اولادك وسندك، واحنا يابا اللي بنسند عمود البيت..
يابا واسط البيت بدون حبال مابظل واقف واحنا حبالك يابا..
للأمانة العيل هذا طلع سياسي محنك واقنعني..
معقول يابا انا هيك ومش داري عن حالي؟
وانت ياعدي سولف..
بدي منك بس طلب واحد..
اذا نجت في التوجيهي خليني اقرأ اللي بدي اياه يعني على كيفي يابا مو على كيفك، حتى ابدع واتخرجلك عالسريع واتعين واعوضك عن ايامك السود وادعم الخزينة..
حلو جدا.. صاروا يركزوا عالخزينة..
وانت ياحرمة..
انا مابدي منك ولاشي بس دير بالك على عيالك واحضنهم واسمعهم..
هذول قطعة منك وبحبوك..
والله بحبوك وبعشقوك ياشين..
لاحول ولاقوة الا بالله..
ااااااه يمة هاي هي قنوات الحوار يالحبية..
اه ياوليدي، لو رديت علي من زمان كان الدار سعيدة سعادة حقيقية مو سعادة وهمية على كيفك..
شفت يمة محلا الحوار الاسري..
ترى يمة بيشبه الحوار الوطني..
كيف يمة؟
يمة الوطن عبارة عن اسرة، الارض هي البيت يمة، والشعب هم الاولاد والبنات والزوجات والامهات، والحكومة هي الاب يمة..
ترى ياوليدي لازم نفتح قنوات مع الحكومة ونحاورها وتحاورنا ونسمع لبعض..
هيك رايك يمه؟
اه ياوليدي..
يا والدتي..
اسمعيني منيح الله يرضى عليك:
يمة كل الشعب بده يفتح معها قنوات للحوار، لكنها رافضة بدها ايانا نعيش على طريقة فلاح العريني قبل الحوار الاسري..
يمة الحكومة فتحت معنا قنوات الضرائب والفقر والجوع يمة..
الحكومة خلت الواحد منا يحاور نفسه وهو ماشي وهو نايم وهو قاعد..
طيب يمة ماحاولت تفتح معهم قنوات الحوار؟
طبعا يمة طلبت منهم هيك وحاوروني يمة..
طيب حلو بشّر شو صار؟ على شو اتفقتوا؟
حاوروني ثلاث ايام بلياليها يمة وطلعت بعد ماتنازلوا عن الحوار..
يعني في جولة حوار ثانية؟
فال الله ولافالك، بقولك تنازلوا عن الحوار ليوم الدين..
طيب يمة ليش حوارك الاسري نجح وحوارك الحكومي فشل؟
يمة انا لما حاورت اولادي كان قلبي عليهم وبحبهم لانهم قطعة مني..
لكن لما حاورتني الحكومة قمعتني لانها ماعمرها اعترفت بي كإبن الها..
شفتي كيف يمة لما اقول بدي حكومة وطنية ذات نهضة حقيقية بكون صادق..
بس اوعدك يمة لاجعلكم جميعا شركاء في ادارة الاسرة لانكم شرفاء مابتخونوا العيش والملح، وهكذا الشعب يمة يعارض ولايخون، شعب ناقد وليس حاقد..
والله الحبس يمة ماببني وطن.
#مين_يسمعنا_يمة
#فلتسقط_كل_البشائر_يابِشر
#د_فلاح_العريني
