مخلوقات فضائيّة فقيرة
حدثت مشاجرة كونيّة في الفضاء بين عشيرة النيازكه والمراوخه ، أدت المشاجره الى مقتل الشاب الفضائي الخلوق سارو على يد ابن عمه جيجي ، اجتمعت عشائر مجموعتنا الشمسيه وقررت اجلاء جيجي وزوجته ميزو الى كوكب الأرض لحين أخذ العطوه من عشيرة النيازكه .
ركب جيجي مركبته الفضائة كيا من طراز سيفيا1، وتوجه هو وزوجته ميزو الى كوكب الأرض حتى وصلت المركبة الى الأراضي الأردنيّة السابعه صباحاً في رحلة استغرقت ثلاث سنوات ضوئيه .
جيجي : وأخيراً وصلنا ، يا مره ظهري انكسر من المشوار
ميزو : بتعرف يا بيبي لولا أزمة زحل وعجقة اورانوس ولا وصلنا قبل سنة ضوئية .
جيجي : احنا وين ؟
ميزو : احنا يا سيدي العزيز على كوكب اسمه الأرض ، وهاي المنطقه بيحكولها الأردن .
جيجي : ااااااه هاي الأردن ياللي فيها كلمنتينا وفساد .
ميزو : يا زلمه شو بدنا فيهم ، سيبنا من لسانك الله يرضى عليك ، كلهم كم يوم وطالعين على كوكبنا فاسترنا الله يستر بيتك .
جيجي : طيب تعالي خلينا نروح على وزارة الخارجيه نعمل اقامه عشان كل شي يكون رسمي
ميزو : قول يا الله
جيجي : الاسم الكريم عفواً
وزير الخارجية : انا ناصر جودة وزير الخارجيه الأردني
جيجي : اه انت حكالي جدي عنك انو مستلم وزارة الخارجيه في الأردن من لما صار الانفجار الكوني العظيم وبعدك لليوم .
وزير الخارجيه : هههههههههههههه مين الحلوه ياللي معك ؟
جيجي : هاي مدام ميزو زوجتي
وزير الخارجيه : الله يخليكم لبعض.
جيجي : يا معاليك احنا قصتنا هيك هيك وبدنا اقامه أكم يوم لبين ما تنتهي هالقصه !
وزير الخارجيه : أنا بحل كل اموركم بس بشرط
انو اطلع معكم وتسلموني منصب محترم
جيجي : معاليك حل هالقصه وهاي شواربي اذا ما سلمناك وزير خارجية مجرة درب التبّانه .
وزير الخارجيه : استنى خليني اقدم استقالتي وآجيك ، بس أغلبك حط معنا بالمركبة الفضائية سدر منسف واوقية مكسرات وقرآن عشان أقسم عليه انو احافظ على الكون كله وحطلك شوية سميدة بدنا نعمل هريسه بحفلة عيد ميلاد المحروسه ميزو .
جيجي : اسمع من الآخر المركبة بتسع ٦ أشخاص ، شو رأيك تجيب معك أكم واحد بعز عليك وبنسلمه المنصب ياللي بدك ياه .
وزير الخارجية : يا سيدي لعاد بالمره خلينا ناخد معالي محمد المومني ناطق رسمي باسم الحكومة الفضائيه ومعالي خالد الكلالده لينظم انتخابات كواكب المجموعه الشمسيّة.
جيجي : على بركة الله روح ناديهم
وزير الخارجيه : اذا هيك شو رأيك نحكي لمعالي خولة العرموطي تستلم وزيرة التمنية الأجتماعية الزُحليّه لأنو مثل ما انا شايفك راح يمتلي الكون مخلوقات فضائية فقيرة .
جيجي : يا زلمه خلّص قصتي وبنزّل مركبة فضائية بولمن تجيبلنا كل الحكومه الأردنية والله بعين على أكم مليار قروض من صندوق النقد الكوني .
عودة عياصرة
