الحظ المايل ….
موقف اجا على بالي من الماضي الجميل قبل سبع سنين، كنت بدي اراجع موظف باحدى الدوائر الحكومية، دخلت ومعي كل الاوراق اللازمة وحتى دفتر العيلة تبع الجيران، لانة ممكن يطلبوة مش غريبة بدوائر الحكومة…..
المهم كان سيادة فخامة الموظف “ابن الحلال” بيحكي على التلفون عن مباراة بين برشلونة وريال مدريد،وكان شاد على حالة مثل ماتور السيارة بطلوع ثغرة عصفور، المهم ،انا بحياتي ما تابعت مباراه بس بعرف اسماء الفريقين وانا بعرف اسمائهم لانة دايما مقرفينا فيهم،وافهمت من المكالمة انه بشجع البرشام(هيك الشباب بدلعوا النادي) ، وبنباهتي والذكاء الخارق اللي بتمتع فيه قلت خليني اخش عليه من نقطة ضعفة ، واعطيها شوية نفاق رياضي عشان يمشي المعاملة…..
قلتله ياخي ريال مدريد ما بيعرفوا يلعبوا بس الحظ اجا معهم والحق على الحكم ، انداري كيف هالنفسيات بشجعوهم، فعلا ناس ما بتفهم ….
طبعا نظرلي بطريقه غريبة، حسيت اني ناط بقمحاتهم، او اني ذابح ابوة، مباشرة حكالي معاملتك ناقصة، ورماها على المكتب ، وين دفتر خدمة العلم، وليش مش كاتب استدعاء، وين براءة الذمة من الضريبة، وحكالي قائمة طويلة عريضه، حتى شهادة الصف السادس(ب) طلبها هالنفسية …..
ساعتها عرفت انه بشجع ريال مدريد، بس انا فهمت المكالمة غلط، فقررت انه امشي المعاملة خاوة، ومشيتها خاوه ،بس بعد اسبوعين….
