يوميات عقله
خالد العلاونه
(هيل بلا جيل)
هي يا مره وين رحتي ؟
خير ..خير ..مالك بتطابل ؟
شفتي الباص تبعي ؟(جواز السفر)
لويش الباص … وين ع باب الله ؟
بدي اروح ع جزيرة فسدستان
وين هاي الجزيره ..؟
بالمحيط الهندي
لا يكون بدك تتجوز هنديه؟
شو اتجوز وما اتجوز رايح اسجل شركه هناك
ولويش الشركه هاي ؟
البلد مقبله على مشاريع وعطاءات كبيره .. اشي سكه.. واشي نووي .. واشي تفلريك(تلفريك) .. واسطوانات بلاستيك .. وغيره وغيراته
طيب وانت شو دخلك ؟
بدي استثمر وآخذ عطاءات واعتمادات بنكيه وكفالات حكوميه .. يعني ملايين يا مره .
وانت من وين لك المصاري يا حسره .. وليش الشركه بالحميط الهندي ؟
ما هو هون مربط الفرس بنسجل شركه وراء البحار برأسمال الف او الفين دولار وبعدين بنيجي هون بنقش ملايين قش
وهي الحكومه مغفله يعني تنها تمر عليها هالسوالف ؟
هيه ..هيه .. مرت .. الفوسفات راحت هيج .. وغاز العدو اجانا هيج .. ومثلهن مثايل … والبترا عالطريق .
يعني بصير معنا مصاري ؟
هيل بلا جيل الله وكيلج