هنيالهم رايحيين رحلة …الصف السابع / م . بلال الشرمان

هنيالهم رايحيين رحلة …الصف السابع

كانت اول رحلة بحياتي ….ورحت رحلة ثانية بالعاشر ….. وغيرهن ما رحت، مش من الطفر بس انا ما بحب الرحلات !!!

المهم رحلة الصف السابع …..

كنا صافين طابور عشان نطلع بالباص بعد ما الاستاذ يتفقدنا ، كنا متحمسين وكانة بدنا نطلع بسفينة التايتانيك ، طبعا كل صف لازم يكون فية واحد شيطان اكثر من الشياطين ، قرد اكثر من القرود نفسها ، والاخ والزميل المحترم كان مصر انة يطلع من شباك الباص (ليش ما بعرف ) بجوز بدة يبلش مغامرات من ساحة المدرسة ، المهم طلع ، طيب مهو الاستاذ بيقرا بالاسماء وبمسك الواحد من كتفة وبرمية بالباص ، حكيتلة رح يقراء اسمك ومش رح يلقاك ، رح يكتشفك ، ما رد علي ….

طبعا انا نصحتة مش خوف علية ، كنت خايف الاستاذ يلغي الرحلة ، اما الولد يروح لجهنم مش مهم ، المهم الرحلة ، وصار اللي في بالي ، واكتشفة الاستاذ ومسح فية الباص
المهم ….

قعدنا بدنا نفطر ، نفسة القرد ما غيرة خلص فطور وصار يرمي تراب على اكل باقي الطلاب ، رجع الاستاذ استخدمة مكنسة لتكنيس ارض الغور ، عشان يسكت

وصلنا لمنطقة الحمة ،ونزل يسبح وراح ما يغرق القرد ، ورجع الاستاذ بهدلة هاي المرة ، شفقة علية وما كان بده يكسر بخاطره…..

قعدنا بدنا نتغدى ، راح وبنشر عجل الباص وهو يلعب بالعجل ، طبعا دايما فية مخبر وعريف سري ، وبعدها الكل بصير يتطوع وينقل اخبار للاستاذ ، المهم ، الاستاذ بدة يعاقبة ( تخيلت انة رح يوكلة او يدفنة بالغور وبعدها رح نرتاح نفسيا) مش هون المصيبة …..
المصيبة انة طلع متخبي ، خوف من التعذيب والارهاب ، وما رضي يرد علينا واحنا ندور والكل ينادي علية ، بعد ساعتين لقيناه منهزم وبيلعب فطبول (كرة قدم يعني ) مع اولاد من المنطقه ، وضاعت الرحلة واحنا ندور على القرد الله يقردة اكثر من ما هو مقرود……
بس اللي استغربتة انه الاستاذ ما عاقبة ، وطلعنا للباص وروحنا بدون ما يحكي معة ولا كلمة ….. انا استغربت الموضوع ولحد الأن ما بعرف ليش؟؟؟