مية ليرة
محمد عياش القرعان
قال لصديقه، بعد ان فاض به الكيل،
يا رجل متى ناوي تسدّني هالمصريّات…. ؟؟!!
كلهن مية ليرة، الله اكبر، صارلهن خمس سنوات، يعني لو اعطيتني كل شهر خمس ليرات، زمان خلصن؟!!
قال يا رجل اصبر علي شوي بس للصيف، وان شاء الله اذا زبطت معي غير اسدِّك اياهن وفوقهن بوسة؟؟!!!
قاله صاحبه، يعني شو بده يجِد عليك من هون للصيف، ما انت معروف، سايق فرشة، طول نهارك بنخصّي جحاش، وقاعد على الفيس بوك والواتس، ولا شغلة ولا عمله، وراتبك التقاعدي محجوز كله للبنك، من ورى القروض تبعتك!!
قال لا، انا ناوي انزل البرلمان وان شاء الله اتوفّق وانجح، وهاظ كله طبعاً بعد دعم العشيرة والاحباب امثالك، واكيد ما راح يقصروا….. والله يا اخوي كلهم وعدوني وقالولي ابشر بالفزعة… وما سالت واحد الا وقالي ابشر، وان شاء الله تتحسن ظروفي واسدد دينك وديون الجميع…. يا اخوي والله استويت، بدي اطلع من هالقاع شوي.. وهاي فرصة ولاحت، وما راح تتكرر، والمرة هاي الدور لجماعتنا بالبرلمان !!
قاله صاحبه، لا يا اخوي انا صبرت عليك كثير.. سِدني ديناتي بالأول وبعدين ترشح للبرلمان او او البلدية او حتى روح ترشح للكونجرس الامريكي، انا ما بهمني، وانا شو دخلني فيك وبرلمانك؟!!
قاله طيب اصبر علي شوي، بدي ادورلي على واحد من قرايبي، بلكي قدرت اضحك عليه بكلمتين، وأوخذ منه قرشين وسدّيتك!!
قاله معك يومين بس او بكرفتك على السجن، وبخليك تبيت بالسجن من هون لما تخلص الانتخابات ترى !!
قاله دخيلك يا اخوي ..والله غير تخرب بيتي… البرلمان اخر فرصة الي عشان اخلص من هالفقر.. لأنه اذا تأهلت من العشيرة اموري تمام…. ادعليلي انهم ينتخبوني داخلي واصير مرشح إجماع، والامور رايحه تسلك معي ان شاء الله !!
قاله يا رب تسلك معك، وانت ما راح تأثر علي، انت كاين ماخذهن من راتبي يعني؟؟!!
