فلمان يتذكر واحد
جملة كُنا نرددها ظناً منا أنها عنوان لفلم أو إسم لبطل الفلم , لنعرف فيما بعد بأنها ما هي إلا عبارة كانت تُكتب في دور السينما , على لوحة العرض لصور الأفلام حيث تقول هذه العبارة (فلمان بتذكرة واحدة).
ربما عدم قدرتنا على قراءتها آنذاك يعود لعدة أسباب . أهمها عدم إتقاننا لمهارات القراءة آنذاك , بالإضافة لتفنن الخطاطين في كتابتها بأنواع خطوط متعددة ومنها الخط الديواني .
أما هذه الأيام ومع إنيّ والعُقبال عند حبايبكوا صُرت أفُك الخط , إلا إنيّ بعدني مش قادر أقدر استطيع أقرا خط الحكومات الرشيدة المتعاقبة . يعني لما يقولوا أصحاب الدولات إنه قراراتهم مش رح تقرب تلات المسخمطين والمشحمطين , وهاظا هما نازلين صلخ بجلود الطفرانين , يعني شو بتترجوا من حكومة عينها على عشر قروش هون وعشر قروش هناك بحجة أن القرش عالقرش بصير مليون .
على سيرة المليون بحب أقول ليهم إنه القرش زمان كان في بركة وحلال مية بالمية , مشان هيتش كان للقرش قيمة , أما قروشكوا يا حكوماتنا الرشيدة ما أظن إنها مثل قروش زمان , عارفين لويش ؟ لأنكوا بتوخظوا القرش من جيبة المسكين غصب عنه , وبحب أذكركوا بحديث لسيدنا محمد عليه الصلاة والسلام …”لَا يَحِلُّ مَالُ امْرِئٍ مُسْلِمٍ إِلَّا بِطِيبِ نَفْسٍ مِنْهُ”. مشان هيتش بحب أحتشيلكوا إنه لو بتظلوا تزيدوا وتعيدوا بالظرايب أيام وسنين , بعمرها موازنتكوا ما رح تسد خزوقها .
أحتشيلكوا أميت بتسدوا خزوقوا ؟… عفواً قصدي خزوق الموازنة ؟
– أول إشي : بدكوا تحسنوا خطكوا وتكتبوا بخط واضح وصريح بحيث الكل يقدر يقراه … فكونا من خطوطكوا المعجلقة
– ثاني إشي : أزقطّوا هالأتشمن حرامي وكفوا إيديهم عن السرقات … بكفي طمطمة عليهم .
– ثالث إشي : بحب أحتشيلكوا راحت موظة السردين والبولوبيف .. هسع بي بنزين وكاز أهم من السردين والبولوبيف .
رائد عبدالرحمن حجازي