عينات من وطني..

عينات من وطني..
د.فلاح العريني

#العينة_الأولى
دكتور اعذرني، ترى أنا بقرأ منشوراتك وبصراحة عالوجع، بس مابقدر احطلك لايك أو اعجاب أو حتى اعلق عندك، أنا عندي عيال عسكر، وهاي حكومة مالينا فيها حيلة.
يارجل والله معذرك، اصلا انت زلمة متزوج وأنا من جيل عيالك ومرتبط، عيب تحط عندي اعجاب او لايك بخاف بعدين انت تعلق عندي وأنا اتعلق فيك واحبك، نحن قومٌ اذا عشقنا هلكنا.
#العينة_الثانية.
والله يادكتور نصحتك الف مرة، وقلتلك لاتكتب ولاتنتقد، ولو ظليت ساكت كان ماسجنوك وانت زلمة كبير ومو حمل سجون ومرمطة..
يارجل انا لو ظليت ساكت كان ماحبسوني، بس انت لو كنت تحكي مثلي كان ما استعبدوك.
#العينة_الثالثة
يادكتور سؤال بس ماتزعل مني..
لو حطوك في وظيفة بتسكت؟
يارجل لو حطوني في وظيفة بسكتك وبسكت كل المتملقين مثلك.
#العينة_الرابعة
دكتور إنت بتطخ عالحكومة كثير وبقوة، انت مين داعمك وساندك؟ وانا بعرف انك مش حزبي، ولاتملك قاعدة شعبية مؤثرة..
يارجل انا املك ماهو اقوى من الحزبية والقواعد الشعبية، انا املك قلمي ولساني، فمن يملك قلمه ولسانه دون بيع او متاجرة فهو قوي، حتى عدوك سيؤمن بك يوما ما..
#العينة_الخامسة
دكتور إنت بتحرق حالك، مشان شعب بده حرق..
لا يا اخي شعبنا طيب واصيل، ولا يستحق الحرق، لانه شعب قلبه محروق عالوطن..
الشعب اللي بيصرف عالحكومة لايستحق الحرق.
الشعب اللي بشوف الظلم بعينه وصابر لعيون الوطن لايستحق الحرق.
الشعب اللي استشهد ابوه وجده وعمه وخاله على تراب الوطن دون مقابل ومازال يصرخ باسم الوطن، لايستحق الحرق.
شعبنا جبار، وحكومتنا في اسفل سافلين.
#العينة_السادسة
يادكتور شو الفلسفة اللي بتنطلق من خلالها في كتاباتك، ومؤمن بها؟
يارجل علينا جميعا ان نفرق بين الوطن والحكومة..
الوطن أرض وقيادة وشعب، اما الحكومة فمجموعة من الافراد يديرون شؤون البلاد خدمةً للعباد، فإن احسنوا علينا طاعتهم، وان اساءوا علينا مواجهتهم، وهنا تكمن الوطنية الحقيقية..
شعارنا اليوم: انقذوا الوطن ممن تولوا زمام الامر فيه.
دمتم شعباً صادقاً..
#فلتسقط_كل_البشائر_يابِشر
#د_فلاح_العُريني
#Dr_Falah_Alorainy