#صلاة_الجمعة_بشورت
في اليوم الأول:
…وين رايح يا ابو الشباب ؟!!
…والله رايح اصلي الجمعة !
…يزم بدك تصلي الجمعة بشورت،، انت عنجد بتحكي ؟؟
..يا اخي شو فيها،، الشورت طويل وساتر للعورة والحمد لله الدين يُسر….ما بعرف يا اخي ليش انتوا بتشددوا وبتضيقوا على الناس هيك؟!
….بدك الصحيح مش راكبة مخي ،،جمعة وشورت ما بتزبط ؟!!
وربنا قال في كتابه (يا بني آدم خذوا زينتكم عند كل مسجد) وأمر بالتطيب للصلاة ولبس احسن الثياب والاستحمام عند الذهاب لصلاة الجمعة، ويجب على الانسان ايضا ان يتأدب مع الله عندما تقف بين يديه …!!
….يا اخي خلص اختصر…..وسيبنا من قصصك القديمة….ربنا رؤوف رحيم…يا الله خلينا نلحق الصلاة بلا كثرة حكي بلاش نتأخر على الصلاة !!
…يالله ماشي .
في اليوم الثاني :
يمر نفس الشخص، مشخص ومتعطر ومطقم ولابس احسن الثياب !
…وين رايح يا ابو الشباب اليوم، شكله عندك مشوار مهم ؟!
..اه والله عندي مقابلة مع شخص مهم !
…لا مهو مبين من لبسك….ما شاء الله عليك، اليوم لابس اللي على الحبل وطالع…؟!
…اكيد لعاد،، لازم الواحد يكون مشخص ومرتب حاله، ولا شو بدك يحكي عني بعدين، مش محترمني ؟!
…لا طبعا ما بصير….
طيب كان رحت بالشورت مثل الصلاة…وشو المشكلة ..مهو ساتر للعورة وما فيه مشكلة حسب رأيك امبارح ؟!!
…هاه شو بتقول ؟!!..انت مجنون يا زلمة، بدك اياني اقابل واحد مُهٕم بالشورت، اي لا زودتها كثير هيك ؟؟!
