شعب مفصوم وحكومة معها توحد
بلدنا عجيبة غريبة لا احنا عارفين معنا انفصام او معنا توحد لكن كل ما نعرفه اننا بلد متعدد المواهب من الحكومة للشعب …ومواهبنا لا تعد ولا تحصى ومنها .
الحكومة بتقترض من الضمان وتقول انها الضامن لاموال الضمان وعلي الضمان انو عصفور كفل زرزور والاثنين طيارين….
صراحة الحكومة مصابة بالتوحد هذا اخر اكتشاف فهي توحدت بقرار واحد فلا شغلة ولا علملة لها الا الرفع والمصيبة انها وحدت مجلس النواب معها فاصبح التوحد مصيبة واما العلاج فقد اصبح كالذي يطارد خيط دخان.
ومن ابرز اعراض التوحد .. البترول نازل ..الحكومة بترفع السعر ..البترول طالع الحكومة بترفع السعر …البترول ثابت والحكومة بترفع السعر …. السعر ثابت الحكومة بترفع السعر .وما فيش سعر الحكومة بترفع السعر.
الحكومة بترفع اسعار عشان تخفض العجز والعجز بزيد وبترتفع المديونية والحسابة بتحسب واحنا بندفع واحنا بنزرع واحنا بنقلع .. لكن بنزرع احلام وبنقلع اوهام.
اما نحن فمن مواهبنا ايضا بتتشكل الحكومة بنطالب برحيلها لمن ترحل بنبكي عليها.. شعارنا كل مسؤول فاسد وحرامي ..واول ما نشوفه بنركض وراه وهات يا صور وابتسامات
وهات يا سلفي ومدح ولمن يغارد خذلك مسبات وردح
الكهربا مقطوعة وبندفع فواتير والمي بالقطارة وبندفع فواتير .النت مبوبز وبندفع فواتير . عنا ضرايب وضرايب على الضرايب ..وبندفع ضرايب اخرى .
رمضان على الابواب …رح تشوف العجب العجاب الكل معصب والكل بحكيلك فك عني تراني صايم ..على اساس انو صايم النا مش لربنا وحملنا جميلة وعامل نفيلة
واما الراتب فهو لرمضان واللي بعده للعيد واللي بعده للمدارس واللي بعده لعيد الاضحى ..بتفوت الشتوية بيجي اللي بعده للكاز والغاز والديزل ….يعني افرح براتب شهر نيسان وبعدها خذ قروض الله لا لايردك
ومن مواهبنا الجليلة تقدمنا الدائم على سلم الاحداث حتى صرنا في مقدمة الدول العالمية من ناحية الحرية في الصحافة والاعلام فالاعلام بالمرتبة 132 عالميا .يعني اللي قبلنا العالم كله واللي بعدنا بالاصل ما عندهم اعلام…وبنط واحد وبقلك مطلوب من اعلامنا ان يخفف السقف …على اساس انو السقف ما وقع على روس الشباب من زمان.
اما ابرز مواهبنا في حقيقة الامر اننا نستطيع تمييز الكاذب من الصادق بسرعة فالعربية كذابة والجزيرة اكذب ..وقنوات العالم غير مهنية والمصيبة اننا نتابع اخبار بلدنا منهم ..وان طلبونا بنروح ركض عليم الله بنكذب الكذبة وبنصدقها.
اكثر مسؤولين بالعالم عندهم مواهب اعلامية موجودين عندنا بطالبوك بالحرية وبمنعوك تنتقد … وبطالبوك بالمهنية وبحجبوا كل اخبارك اللي بتزعل المسؤول… بطالبوك بمحاربة الفساد… والفساد بنى اوكار في زوايا الاعلام اقسم بالله اعلامنا سحج للحكومة اكثر من الحكومة .ونفس الاعلام انتقدها بالاعلام البديل اكثر من المعارضة نفسها.
بلدنا متطور في الاعلام والاعلام بلا تاثير خارجي .ولا حتى داخلي .. وبلدنا بحارب العشائرية وبنفس الوقت بحصنها وبحميها….ولدينا مخزون استراتيجي من صور جمعة مباركة وصباح الخير ومساء الخير..وابعث هذه الرسالة لعشرة اشخاص فان لم تفعل رح ينخرب بيت اللي خلفوك.
تستمر المواهب . الشعب بحارب الفساد وبنفس الوقت بحميه وبرجع بنتجه … الشعب بدو رواتب وما بدو يشتغل وان اشتغل بدو مكاتب والمكاتب عند النجار والنجار بابو مخلع..ان خشيت الاحوال بتطلع احول وان رحت الاراضي بتطلع مسطول .. احنا البلد الوحيد في العالم اللي بتلاقي موظف فيها راتبه 300 دينار وراكب سياره بسبعين الف وعندو بيت بمائة الف..
بتشتري سيارة بتروح ترخص بتلاقي عليها مخالفة قبل تاريخ الصنع وممكن تكون باربد وتلاقي المخالفة بالعقبة …واحلى ابتكار عنا اشتري السيارة على القبان.
ومن مواهبنا عنا امن وامان وكل اسبوع سرقة بنك او كازية او سوبرماركت …عنا سياحة ووزير السياحة ما بعرف اين تقع المخيبة الفوقا وان سالناه عن التحتى .بفكرها شتيمة.وبلدنا متطور في شبكة الطرق وكل يوم حوادث موت على الطرقات ومتطور في الطب والاخطاء الطبية فضايح .ومتطور في التعليم والطالب بوصل توجيهي ما بفك الخط…
على تويتر شبيحة بثياب ملائكة يا خزاة العين وعلى الواتس اب … حدث ولا حرج… اما على محرك البحث جوجل “بديش احكي فالوضع عيب لانو احنا الترتيب الثاني على العالم رغم الحجب.
وكمان الشعب جوعان ومقضيها صاجيات …ومناسف ومشاوي ورحلات …والرياضة مصايب والمنتخبات سلامة تسلمكم…لا زابط مناكير ولا بدي كير …ولا مارس وسنيكرز وكنتاكي ..والاهم جميل جمال مالوش مثال.
وخذلك كمان ..اعتقلوا بياع الترمس صرنا نسمع راتبه 600 دينار عنده اربع عمارات ومؤجر ومستاجر ..بطلع واجد ثاني بحكيلك وضعه زفت وما عندو شي ..واحد بحكي ابنه حبسه والثاني بحكي بنته كفلته.. المهم انهم كلهم شافوا ورق ووثائق ..وادلة والكل بهرف وما بعرف يعني لا الفقر عاجبنا ولا الغنى عاجبنا ..
يا جماعة الحياة صفيت طعة وقايمة .. لا احنا فاهمين شو بدنا ولا عارفين شو بدنا حياتنا صفيت مثل سواليف الحصيدة… بكل اختصار كل السالفة احنا انفصمنا بعد توحد الحكومة.
