دمعة على خد الوطن
كامل عباسي
كشكية، جعاجيل، مجدرة حمرا ، وبصل اخضرمزروع بالحواكير
صينية جاج محمّّر ، جاج بالفرن متربى عالبيادر الفرن اللي يتزبل وريحة الدخان احلى من عطر فرنسي
مجدرة بلبن نعاج عايشه معنا بنفس البيت ما كنا نعرف طناجر التيفال التي لا تلصق ولا طناجر البريستو وطناجر تطبخ بلا زيت ولا شركات دايره عبيوت الناس تبيع طناجر ومكانس كهربا اصلا ما كان عندنا كهربا .
لا تصدق في اطيب من طوس فخار ومجدرة وجهها محروق وتاليها ملزق بالطوس نسميها قحاطة نتهاوش عليها تلاقيها ذايبة وكم بيضة نشويها على حمّ الفرن
ومن تتفشخر تعملك امك صينية خضار بالفرن كوسا وبندورة وبطاطا وبصل كثير وزيت زيتون اصلي قبل الناس تبطل تعرف الله وتغش الزيت وعلى طبق قش من قصل قمح حوران وخبز مردد غرقان زيت لرقبته
لم نكن نعرف انفلونزا الخنازير فلم يكن لدينا لصوص المال العام ولا نعرف الجلطات اللي توخذ الشباب ولا نسمع عن السرطان كان الواحد طبيب حاله و ايام الربيع الخبيزة سيدة المكان والحواكيروالعكوب والعلت والمُرارمسلوق ينمعس مع ثوم وزيت وفطاير الحُميض والسبانخ وقراص العيد
اما مواسم الفرح ايام تعبي البيت مونة لبنة وجميد وبرغل خشن وناعم للكبة وبرميل السليقة يدور بالحارات من بيت لبيت من برا مشحبر اسود وقلبه ابيض من قلوبنا اليوم كان القمح قمحنا والفرن من صنع الجدات من تراب بلدنا مش مستورد من حقنا اليوم ان نبكي على حال الوطن وحالنا
