حتى الكذب مستحيل
ـــــــــ
الصبح الساعه 7 و ½ هودّت ع دايرة الاحوال مشان اجدد الهويات الي ولكل بناتي وجيزانهن و اولادهن كمان .. وصلت قبل الدوام ب ¼ ساعه ع علمي الدوام ببلش عال8 ..والا همو كل الموظفين ع مكاتبهم جيت بدي اقطع ورقة دور والا الاصوات من الكاونترات بندهو علي .. لا يا حج ما تغلب حالك شرّف عندي لا هون لا عندي .. كانت بدها تصير طوشه بيناتهم جيت عند هالصبيه الحلوه .. استلمت الاوراق مني .. وقالتلي وابتسامتها من النيع للنيع عشاك ما تغلبت في الجيه لعندنا .. تفظل تريح وانا بجيبلك الهويات لعندك وادا بتحب تروح ع الكفتيريا روح في كل اشي وببلاش وبامكانك توخذلك سندويشه كمان اذا بتحب
نزلت و صدقوني ما لحقت اكمل الكابتشينو تبعي والا الصبيه جايه وعينبها بالارض قال ايش خجلانه لانها اتأخرت في الهويات .. حكيتلها ما في مشكله .. ردت علي شكرا كتير لزيارتك آسفين عزبناك كتير معانا .. اهلا وسهلا .. اي خدمه تانيه .. مديت ايدي بدي اعطيها بغشيش زعلت وحكت ولو هاد واجبنا .. ما بنوخد عليه الا رواتبنا .. وظلت معي تا وصلتني للباب وحكتلي بااااااي .. اللي قهرني ابتسامتها .. تلمهم دبيت ابدي ع جيبتي لقيت معي ابو 22 نيره قلت خليني اميل أفلل السياره بانزين .. ورحت عالطيبه وشريت خروف بلدي ذبحولي اياه وسلخوه وحذوه بالسياره مع كامل مستلزمات المنسف من جميد وسمن بلدي قلت ما هي واقعه واقعه خلينا نعزم هالبنات وقواريطهن عالغدا حلوان الهويات .. و عقّبت معي ابو 6 نيرات للكنافه والببسي والصنوبر واللوز و كمان مشان اعبي الماخوذ التلفون رصيد للشهر الجاي … دخلت ع ام مروان والا هي مكشره .. و راحت فاعطه في زقمي وقالت انا قلت والله ما يعاود علي الا بعد ما يفرتك ال20 نيره اللي حيلتو .. وهاظا انت فرتكتهن خوف الله .. هات اشوف قديش ظل معاك …وبعد عملية تفتيش شملت كل انحاء الملابس الخارجيه والسريه ما شافت غير6 نيرات قامت شهقت وإنجنّت وانحنّت وصاحت ول عليك بس هذول اللي ظايلات معك ..؟.. يا حرامك .. اذا رب العالمين حكى ان المبذرين كانوا اخوان الشياطين .. وانت منهم …والله حرام .. هاظ كيف لو الحكومه اخذت منك رسوم هالهويات … شو بدك تسوي .. المهم ساعه وانا اصولح فيها تا رظت عني .. مهو الصحيح لازم اصولحها والا كان مين بدو يطبخ كل هالأكل …المهم هاظ احنا اتغدينا واتحلينا وهيني مكوّع قاعد بدخن ارچيله من المعسلات اللي شريتهن مع مستلزمات المنسف وقاعد بالخفيه بحسب شو بدي اسوي بال3 نيرات اللي عقبتهن تالي ال22 وخبيتهن عن ملعونة هالحرسي .. بلكي رحت شريتلي بنطلون وقميص والا فصلتلي دشداشه لعيد رمضان ..
الله يخليلنا شهر نيسان مشان نعرف كيف نتخيل قديش الكذب او بالاحرى الخيال فيه بكون حلوووووووو .. سامحوني الكذبه بيظه
يا سيدي اعتبروها حلمه
كل نيسان وانتم بخير
Kamalafaneh@yahoo.com
April 1st.2017
