كتب … توفيق المبيضين
فضيلة #مفتي_المملكة ..لماذا نغضب ، ومن قال لك بأن #الاردنيين #غاضبون …؟..أكيد في لُبس فضيلتك …
فالحمدلله ..
– #أسعار البضائع والأكل في إنخفاض مستمر
– #المحروقات أسعارها في النازل ، حتى البنزين ، ولا إشي ، ومن “البطر” بنضل نلف ونلف في السيارات مشان نخلص البنزين ونعبي من جديد
– لم نبع أي متر أرض لغايات تدريس أبناءنا ، فرسوم التعليم الجامعي لدينا رمزية و شبه مجانية .
– #الوضع_المعيشي لجميع المواطنين عال العال ، بإستثناء فئة الأثرياء ، فهم يشتكون من إنخفاض الأرباح عن الأعوام السابقة ..هاي مشكلتهم بسيطة وبتنحل .. ولحلها زيدوا الضريبة شوي على المواطن ، مشان تعويضهم عما فقدوه من أرباح متوقعة .
– أسعار الخدمات وتحديدا الكهرباء ، في النازل وما عليها حكي ، ومن رخصها ، صرنا ننام وجميع اللمبات في الدار منوّرة .
– #الضرائب المفروضة علينا خفيفة جدا جدا ..خصوصا الضريبة الخاصة على البنزين وضريبة المبيعات ..والشعب يتطلع لزيادتها شوي – يعني مش كثير ، مشان المسؤولين يعرفوا يسافروا براحتهم ويصرفوا مياومات ويجيبوا هدايا لعائلاتهم .. لانه ، ما بهون علينا ، ومش حلوة مسؤول اردني يسافر وما يطلعله “مصاري” من وراء السفرة وما يعبي الشنط بذلات وفساتين وعطور وربطات عنق …
– الخدمات الصحية الحكومية عال العال وافضل من سويسرا وأميركا ..برا بحسدونا على هيك خدمات ومستشفيات
– لدينا مجلس نواب ، جميعهم منتخبون ولم يتم تعيين أي منهم ، وهم متفاعلون إلى أبعد الحدود مع قضايا المواطنين وهواتفهم جميعا دائما مفتوحة لإستقبال اي ملاحظة ، إلا القليل القليل وما ندر ، والوزراء الحمدلله دخل كل واحد الشهري حوالي 8 آلاف دينار بس ومصروفلة سيارتين 3 بس ، والنائب اكثر من 3 آلاف دينار ، وبرأيي لازم زيادتهم شوي ، لانه حرام ، في شوية غلاء …
– يوجد (شوية) فساد وفاسدين ، بس مشكلة ، مقدور عليهم ، ولندن وبروناي وشركات الافشور مش بعيدة ، هيها “مقرط العصا”
– تم إسترداد وتحصيل المليارات المنهوبة من مقدرات الوطن ، واللي ضل ما تحصل مش محرز ..”ملاليم “
– كل الشباب بشتغلوا وبرواتب مجزية ..وهمه كم واحد قاعدين بدون شغل ، وبعملوا شوي حركات وإحتجاجات ومطالبات بتشغيلهم ..مقدور عليهم ، وعلى سيرة الرواتب ، الرواتب مكفّية الموظفين والحمدلله ..يمكن آخر يوم بالشهر بنزنقوا شوي ، وكلها كم ساعة وبنزل الراتب ..، لهيك إحكيلهم فضيلتك ، لا يهكلوا هم ….
كل هذا فضيلتك ..فعلا ، لا داعي للغضب…. وإحكيلهم يتطمنوا ؟؟؟؟
مدير تحرير ديرتنا الأردنية الاخبارية
info@deeretnanews.com
