#الأب_الأم_الإبن
الولد: يمه بدي اشتري اواعي للمدرسة، اواعيّي مهتريات وصرت استحي اطلع فيهن بالشارع؟؟
الأم: مافيش يمه، من وين اجيبلك؟؟
الولد: يمه، معك خمس ليرات، بدي اروح رحلة مع اصحابي؟؟
الأم: مابيش معي يمه، من وين أجيبلك، ولك انت ما بتحس ولا بتشعر معنا؟؟
الولد: يمه بدي خمس ليرات عشان اشتري بطاقة خلوي.. خطي بدهم يفصلوه؟؟
الأم: ولك من وين اجيبلك، ابيع حالي يعني…ولك انت مبولد؟؟
اللي بعطينياهن ابوك يا دوب يكفنكو اكل وشرب، ابوك محملني المسؤولية وهو ولا عنده ولا عباله… ومخلي قرفكو عليّ لحالي، وهو بعد ما يروح من الشغل طول نهاره طاش ومكيف حاله ولا تقول عنده قواريط وقرود مثلكو؟؟؟
الولد: يمه سمعتي آخر خبر؟؟؟
الأم: لا والله.. شو بيه جديد.. حدا مات من قرايبك؟؟
الولد: لا يمه، فال الله ولا فالك، بس سمعت انه مرة عمي مشترية غرفة ضيوف جديدة طخ، اما شو بتجنن؟؟؟
الأم : تمدُّ يدها بسرعة على مخبأها السري الموجود في عُبّها،، وتتناول صرة من المال… يمه هسع بدك توخدني على أربد قوام قوام، بدي اطلع اشتري غرفة ضيوف جديدة…. هي مرة عمك بيش احسن مني دخيلك؟؟؟
الولد: على حساب يمه، انه ما معك مصاري، بتقطعي ايدك وبتشحدي عليها وطول نهارك بتتشكوني من الطفر…. من وين هظول جبتيهن لعاد؟؟؟؟
الأم : هو ولك انطم وعيرنا سكوتك، احسن لا اقطّع هالشبشب على راسك….!
الولد: حاضر يمه.. حكم القوي، حسبي الله ونعم الوكيل بس، واني الله لا يردني !
