أوف شو
للتوجيهي ما كنت بعرف غير جزر القمر وجزر الحج سليمان وجزيرة غرينلاند، كنت بعتبر حالي شاطر بالجغرافيا، كنت حافظ عواصم معظم الدول وتضاريسها ومناخها واسامي الفاسدين فيها ما عدا اللي بالاردن لأن ما كان عندنا فساد.
مشكلتي الوحيدة كانت بالجغرافيا اني ما كنت اقدر افهم قصة خط الاستواء، وشو يعني خط الاستواء، وما فهمت كلام الاستاذ بدران لما مرة حط ايده ع كتفي بالحصة وقال: اذا ما فهمت خط الاستواء، كل اللي حافظه بالجغرافيا ما بنفعك بشلن.
ولما دخلت الجامعة صرت كل يوم اسمع بجزيرة جديدة، وما كنت افهم السر الغامض بظهور هالجزر من العدم مع كثرة الحروب حول العالم، مع كل قطرة دم بتسيل بالعالم كانت بتظهر جزيرة جديدة.
من بين كل هالجزر، كانت تلفت انتباهي دايما الجزر العذراء، كنت اتخيل نسوانها عذارى وجميلات وبشرتهن ملفوحة بالشمس وما حدا بتحرش فيهن. كنت اتخيلها كلها ورود ما حدا بمد ايده عليها، كنت اتخيل شوارعها نظيفة من الاوساخ وما فيها بسطات، كنت اتخيلها خالية من أي مظهر يفسد جمالها.
وثائق “اوف شور” وفضيحة بنما، علمتني الدرس اللي ما فهمته من الاستاذ بدران، وفهمت ان خط الاستواء هو الخط اللي بفصل بين اصناف البشرية وبصنف مدى سعادتها، فهمت أنه خط الاستقواء، الخط اللي بظهر مين يعيش بقصور النور، ومين بعيش بسراديب وانفاق الفقر والظلام.
فهمت ليش كانت تتكاثر الجزر مع الحروب، فهمت ان تجار الفقر والدم بكل العالم همو اللي ببنوا هالجزر ليخفوا فيها مصاريهم.
فضيحة بنما ذكرتني بقصة ختيار عندنا بالقرية انسرقن مصرياته، راح ع شيخ بفتح بالمندل ليشوف مين اللي سرقهن، فقال الشيخ: يا حجي مصاريك اخذهن واحد دوك اياه مواصفاته كذا كذا، ومشى بطريق الوادي ووصل لعند سيل المي واختفى اثره. وما بقدر اعرف وين راح بالمي. فقال الختيار: يا شيخ طمّه لهالسيل وامشي وراه.
فضيحة بنما مثل سولافة مصاري الختيار، بخبوا المصاري بنص البحر عشان ما حدا يعرف يقص اثرها، ولا حدا يعرف مين اخذها.
أوف شو مصدوم، حتى الجزر العذراء طلعت وهم، اغتصبوا عذريتها مثل ما اغتصبوا وطني.
