سكتش …….
تعاني الغالبية العظمى من الأردنيين .. تعاني الارتفاع الفلكي لأسعار اللحوم والكثير من المواد الغذائية الضرورية لسلامة الجسم والعقل .. ويقابل الشعب المرح جنون الرفع بروح رياضية وتبادل النكت لتمرير الوقت .. بينما تختلف نظرة الحكومة بين تطمينات ونفي الرفع وكأنها.. تستهبل .. الشعب المتابع عن كثب هذا الرفع الملتهب .. الشعب الذي نسي طعم اللحم وأصيب بنقص الفيتامينات الموجودة فقط باللحم والتي يتسبب نقصها بالكثير من الأمراض نذكر منها على سبيل المثال لا الحصر قلة النوم
بينما أتخيل الحكومة تقول لمن يعاني الأرق من شوق الجسم للفيتامينات التي يوفرها اللحم .. تقول بخفة دم Count Sheep and sleep ..
هنا أقول للحكومة : اللهم شب وزنطر قولون الحكومة .. وتروح على سوق الخضار تشتري ضمة نعنع .. تلف السوق كله وما تلاقي غير ضمة خربانة تعبانة لا ريحة ولا طعم .. ويوم ما تيجي تغليها بلكي بتخفف نفخة قولونها تلاقي المي مقطوعة .. تروح الحكومة ع رجليها تشتري مطرة مي والنفخة بتزيد ويوم تيجي تغليها تلاقي جرة الغاز خالصة .. وتستنى وهي بتتلوى من النفخة لما تمر سيارة الغاز .. ولما تيجي سيارة الغاز .. ترن الحكومة ع الحارس يرفع لها جرة جديدة تلاقي تلفونه مغلق .. ترن ع صاحبه .. صاحبه يحكيلها قضبوه الشرطة لأنه ما معه تصريح ..
هون عاد الحكومة ما بتلاقي غيري .. لأنها بتعرف إني هبلا وطيبة وممكن تميل علي .. وتستعير .. من عندي جرة .. ومثل كل مرة .. بتوخذ مني جرة وما بترجع .. وهيكا .. لا الحكومة بتبطل شحدة مني وتستغل طيبتي .. ولا أنا ببطل هبل …… بقلم وزيرة الطراونة .