يوميات عقله (حشوة كبه)
عقله راجع من السوق ومستعجل مثل اللي حدى لاحقه بعصاه ومن باب الدار بنادي على مرته
عقله : هي يا مره … وينج … تعالي جاي
مرته: خير يا زلمه … مش صابر تا تفوت ع الدار .. مالك شو صايرلك
عقله: تعالي تعالي … وين عصملياتج اللي جبتلج اياهن عالعرس
مرته: خير شو جابهن عبالك هسع .. لويش بدك اياهن
عقله: اجى وقتهن … هاتيهن
مرته: مساوي حالك ناسي مش اخذتهن هذيك السنه تا تترشح للانتخابات
عقله: اه .. بس انا ما ترشحت … هسع بدي اترشح بدي اساوي قاءمه
مرته: ما ترشحتش وما رجعتش العصمليات .. وين رحت بيهن
عقله: صحيح حطيتهن بالبنك ليوم عوزه .. وهاي اجى يومهن ..بنفعنا بالحمله
مرته: يا زلمه من عقلك … كل مره بتقول بدي اترشح وبتبطل .. فكنا من هالسولافه
عقله: لا هالمره ثابته وهوينه والكرسي مضمون
مرته: شو مضمون بيها يا عقله هالمره اصعب من كل مره
عقله: توكلي على الله هينه هينه
مرته : شو هونها
عقله: بشكل قايمه وبجيبلي اثنين ثلاث مرشحين معي … جماعتهم بعطوني اصواتهم وما بصوتو لجماعتهم ومنعطيهم شوية مصاري وهيج بنجيب صوات وبننجح
مرته: مش فاهم يعني جيف ما يصوتوا لحماعتهم
عقله: بصوتوا للقايمه وبالقايمه بصوتوا الي بس
مرته: وسو مستفيدين هم من هالسولافه
عقله: بنعطيهم مصاري بالمقابل والمرشحين بكونوا حشوه .. يعني زي حشوة الكبه
مرته: شو كبه وما كبه يا زلمه … بدك تطير المصريات … هو اللي بده ييجي حشوة كبه قديش بده يكون معاه صوات .. ميتين ثلاث
عقله: شو السوالف يا مره … لازم يكون معه اقل اشي خمس تالاف صوت … بنجيب ثلاث بصيرن مع صوات جماعتنا عشرين الف صوت
مرته : مين هو يا عقله اللي بمون على خمس تالاف صوت حاطهن بشوال وداير بيهن للبيع
عقله: انتي شو بدريج .. الحشوات كثار وعند المصاري بيجو ركاض
مرته: والله ياعقله يا خوف قلبي اللي معه خمس تالاف صوت انت حشوة كبه
عقله: قومي من قبالي يا مره … عمرج ما شديتي ع ايدي … دايما بتحبطيني ..ول عليك … مش مصدقه اني ناجح ناجح والكرسي مضمون … والحشوات حبطرش
