ليش ما حكيتوا للملك / عمر عياصرة

ليش ما حكيتوا للملك

التقى امس وفد من وجهاء جرش «اختارهم المحافظ» الملك عبدالله الثاني في الديوان الملكي، فتحدث بين يديه مجموعة تم اختيارها وربما تم اختيار عناوين ما ستقول، فلم يعجب الامر اهل المدينة، فكتب ابن عمنا المبدع عودة العياصرة تغريدة على الفيس بوك اتركها بين يديكم:
(البارحة استقبل الملك شخصيات ووجهاء من مدينة جرش في الديوان الملكي، بعد تناول طعام الغداء، اجتمع فيهم للحديث عن احتياجات المحافظة، توقعنا أن تصل صرخة جرش على لسان أحدهم، توقعنا أن تصل هموم وأوجاع جرش بالتفصيل، توقعنا كلمة حق تشفي غليل الجرشيين، لكن صدق المثل القائل: «المقري مبيّن من عنوانه».
ليش ما حكيتوا للملك عن الفقر والناس الطفرانة بجرش! ليش ما حكيتوا عن العالم ياللي بتشتري رغيف الخبز دين!، ليش ما حكيتوا عن الناس الموجوعة المظلومة بجرش!، ليش ما حكيتوا عن محافظة ما فيها جامعة حكومية وحدة!، ليش ما نقلتوا هموم جرش بأمانة!
معقول نسيتوا كم خريج جامعة بجرش قاعد بالدار وكم عاطل عن العمل من شباب المدينة، معقول نسيتوا ريحة المجاري بجرش ياللي بتعطّرها الصبح من عند المدرج الجنوبي لعند قوس النصر، معقول نسيتوا البنية التحتية البسكوتية، معقول نسيتوا شو بصير بجرش بالشتوية!
معلش يا جرش لا تزعلي ولا على بالك، هاي مش اول مره بيخذلوكي أهلك وناسك، بعرف يا جرش انك تعبانة بس شو نعمل كل الوطن تعبان، بعرف يا جرش أنه الحكومة ما بتعرفك إلا بجاهة عرس أو يوم المهرجان).