Made in jordan
ظواهر غريبه بلشت تتسلل لمجتمعنا الاردني
بقولوا اليوم واحد مداوم بوحده من الجامعات ببنطلون فيزون
والله محيي الامن الجامعي ساترين عليه ببنطلون جينز ملبسينه ياه
وكمان حفل الخطوبه الرومانسي اللي صار بجامعة ثانيه
اللي عجزوا الاتراك والهنود يعملوا مثله
طبعا كان صعب نصدق انو بالاردن للوهله الاولى
لكن الحجاب الي كانت البنت لابسيته
واللي كانن البنات السحيجه لابساته
ما خلالنا مجال انو ما نصدق
المشكله انو الغزو الفكري اللي اله كذا سنه
صعب نعالجه بيوم ويومين
الفضل طبعا برجع للفضائيات
اللي صار نتاج عقود من الضلال
والتوهان والبعد عن الهويه الاسلاميه والعربيه
والان حان موعد الحصاد
يعني انا مش فاهم هذول كيف بفكروا
في امثلة نجاح كثيره يقتدى فيها بهالبلد
ولو انها مسلسلات (since fiction )
مش زي هيك
اللي عاش وعيّش ولاده وقراهم وجوزهم
من ناتج البقرتين اللي عنده
واللي طلّع جيل متعلمين بدونم باميه كان يزرعه ويبيع منتوجه
طبعا كيف زبطت معهم مش فاهم!!!
هذا اللي لازم نوخذ ونتعلم منه
تركوا قصص التضحيه والحب الاردنيه
وبلشوا بسوالف بتغضب رب العالمين
بدل ما يسنّوا هالسنه السيئه
ليش ما عملوا شي يفيد دينهم وبلدهم
لكنهم فضلوا يقلدوا الغرب
والمجتمعات المنحله
ويوخذوا منهم الشغلات الهابطه
وهون بقتبس من قول نبينا عليه الصلاة والسلام قبل ١٤٠٠ سنه:
( ” حتى لو دخلوا جحر ضب خرب لدخلتموه”)
صدق الرسول الكريم
نفسي اعرف اللي بفكروا هيك
شو هالجيل اللي بده ينتج عنهم
بدها شوية تفكير ومراجعة للنفس
هل اللي بصير طبيعي؟
وهل مجتمعنا الاردني عادي انه
يصير فيه هيك؟
الاردن اللي صارت على ارضه معركة مؤته
يصير فيه هيك؟
الاردن اللي صارت على ارضه معركة اليرموك
يصير فيه هيك؟
الاردن اللي قدم جحافل من الشهداء في حرب فلسطين
يصير فيه هيك؟
الاردن ارض الشرف والرجوله
يصير فيه هيك؟
الاردن اللي طلّع علماء اجلاّء
يصير فيه هيك؟
بكاد اجزم انهم ما قريو عن المعارك
واكثر اللي بعرفوه عنهن :اسماء
مرتبطات بالتحصيل العلمي على اكبر تقدير
ان لم يكن بالطشيش واللهو
صحيح انو احنا بلد عقد حاله
وصحيح انو اكثر شي بنلاقيه
مكتوب عليه صنع في الاردن:
كاسة بلاستيك
او أُجّه(حصاله)
اوابريق وضو
بس صدقوني لو قريتو شو منقوش عالشرف
بتلاقو : made in jordan
وبختم بقوله تعالى:
{ظهر الفساد في البر والبحر بما كسبت أيدي الناس ليذيقهم بعض الذي عملوا لعلهم يرجعون * قل سيروا في الأرض فانظروا كيف كان عاقبة الذين من قبل كان أكثرهم مشركين}
صدق الله العظيم
