مقال الثلاثاء 4-7-2017
النص الأصلي
نحن بخير طمئنونا
على طريقة الراحلة الكبيرة كوثر النشاشيبي في برنامجها الجميل رسائل وشوق حيث كانت تختتم الرسالة المحلّقة في سماء صوتها من والى الأهل في فلسطين بعبارة دافئة : نحن بخير طمئنونا.. كأن تقول: نبلغكم أن هاجر أنجبت مولودا ذكراً أسمته حلمي وهي في صحة جيدة نحن بخير طمئنونا..إلى العمة سريّة والخالات المازة وعفيفة وحفيظة نبلغكم أن أم نظمي أجرت عملية “مي زرقا” لعينها اليسرى وتكللت بالنجاح ..نحن بخير طمئنونا..
أودّ أن أرسل رسالة بنفس المحتوى والروح إلى حكومتنا الموقرة التي المس انقطاع أخبارها منذ منتصف رمضان ،فلا حراك ولا زيارات ولا قرارات ولا ململة ولا جردة حساب حتى تبيّن كيف نحن واقتصادنا جرّاء ما يجري من تخاصم الأخوة في الخليج .
جميع أركان الحكومة “متخبيين من الشوب” بالكاد يطل الناطق الرسمي د.محمد المومني ويوضّح موقفاً ملتبساً هنا وهناك ويغيب..كنّا نتخيّل أن الحكومة بعد التعديل ستصبح كتلة نشاط ،شعلة نارية من الحركة والانجاز والزيارات الميدانية ، كنا نتخيّل أن غبار السيارات الحكومية المسرعة في المناطق النائية ستسبب لسكانها السعال والتحسس والربو لكثرة المرور..طمئنونا .ان شاء الله ما في شي؟؟ وين هالغيبة… وزير الصناعة والتجارة كيف صحته إن شاء الله بخير ، بده أغراض من السوق أني جاهز…في عند وزير التربية أولاد توجيهي السنة؟؟ قديش آخر فحص كوليسترول ودهون ثلاثية عند وزير الصحة؟ شو بوخذ له لوبيد 600 وليبتور 40 كثير ممتاز..بس لازم يلعب رياضة!!…شو أخبار وزيرة التنمية ان شاء الله “قالشت ع الشغل”؟.. صحيح وزير النقل ما بتغلّب بالجيّة ع الوزارة ..بتعوّد بتعوّد أولها بس ،لما يعرف خطوط الباصات اياها اللي بتمر من قدام الوزارة بنصير سهلة الجية والترويحة …طمنونا عن وزير الطاقة إن شاء الله سلكت أموره…كل بداية صعبة بس بتمشي الأمور..ان شاء الله بقدّنه “بدل البنزين” اللي بتصرفوا له اياهن…وزير الأوقاف خلص الستة من شوّال ولا لسه..بالله؟؟ الله يتقّبل منه ان شاء الله..طيب متى عشرة الضحية؟؟…
احنا بخير يا دولة الرئيس طمئنونا عنكم انتم ..كيف أخبارك انت إن شاء الله مرتاح ؟؟ كيف الإسكندرية والهام شاهين وماما فوزية وغادة عبدالرازق؟؟ جبتلنا حزامات جلد من هناك..عشان نشدّ الأحزمة ع البطون؟؟ ان شاء الله مش ناقصكم شي..ان شاء الله ما في بطالة بصفوف اولادكو ..او انحسار رواتبكم أو ارتفاع الأسعار عليكم..احنا اولله احسن من هيك عبث..مكيفين لا حرّ ولا شرّ الحمد لله قاعدين “بنتبغدد” بنرش قروش بكل مطرح والمصاري “عفق” الحمد لله وراتب شهر 6 قد ما صرفنا منه مش راضي يخلص “منعون عرضه”..
تؤمرونا بشي؟؟ أمانة..بالله عليكم!!..بالله لا تخجلوا أخوكم الزغير أني…يا الله سلموا كثير السلام…
احمد حسن الزعبي
ahmedalzoubi@hotmail.com
