“تعريفة الحكومة” تغضب الأردنيين ودعوات لمقاطعة المحروقات

سواليف – رصد
قررت لجنة التسعير الحكومية امس الخميس تخفيض سعر لتر بنزين أوكتان 90 خمس فلسات ” تعريفة ” وتثبيت سعر لتر بنزين اوكتان 95 وتخفيض سعر لتر السولار والكاز بمقدار قرش واحد ، في الوقت الذي شهد فيه شهر اكتوبر الفائت انخفاضا كبيرا عل أسعار النفط .
تخفيض سعر البنزين 90 الاكثر استهلاكا في الاردن بهذا القدر الضئيل ، واستخدام الحكومة لمعادلة تسعيرة للمحروقات ما زالت غير مفهومة للمواطن ، حيث تعمد الحكومة الى رفع المشتقات النفطية بصورة كبيرة حتى لو كان ارتفاع النفط عالميا قليلا ، بينما تخفضه بنسب قليلة غير ملموس أثرها للمواطن .
تعريفة الحكومة كما أسماها الأردنيون إثارت الغضب على مواقع التواصل الاجتماعي ، وسط دعوات لمقاطعة البنزين واستخدام المواصلات العامة وذلك للحد من ارباح الحكومة من بيع البنزين .
في سواليف رصدنا بعض التعليقات حول “تعريفة الحكومة ” :

**الحكومة أخت الشلن اللي بتنزل سعر البنزين تعريفة بتكون حكومة أخت تعريفة

**بما أن الحكومة لم تلتزم بشفافية تسعير المحروقات التي انخفضت عالميا من ٧_١٠٪ وتعتمد على سرقتي كمواطن فقد قررت بشكل شخصي عدم استخدام سيارتي(ايقافها بشكل تام) يومي السبت والأحد..والالتزام بتخفيض استهلاكي الشهري الى النصف واستخدامها فقط بالمشاوير الضرورية والطويلة ..مستعينا بإنجاح خطتي بالمشي والمواصلات العامة..في احتجاج مني على هذه السرقة الوقحة والاستخفاف بنا كشعب.
#أنا_مواطن_مش_طرطور
#خليها_تكربج
أ.ح.ز

** حراميه لسى كروشهم مش فل

** سجل يا تاريخ سجل من إنجازات الرزاز
الله لا يكثر خيركم

** بعاملونا وكأننا أغبياء برفعو المحروقات قرشين ونصف برجعو ينزلوها تعريفه برجعو يرفعونها ٣ قروش برجعو ينزلوها قرش برجعو يرفعوها ٥قروش برجعو ينزلوها قرشين في المحصله هم قاعدين برفعو المحروقات كل شهر اقل اشي قرشين شعب ميت نايم ما آله اي ردة فعل يجب على الكل ان يتحرك

** تخفيض تعريفة على
بنزين ٩٠ وكمان خمس
لمبات بسعر تحفيزي …!
طيشو وعيشو
ولا صارت في السويد

** بعد هالاحداث الحوالينا..والله قلنا الجماعة بخافوا😟.. بعرقوا😰.. بتعضوا 🙄..بستحوا 😏طلعوا مصلجين😄… ولا بسووا #تعريفة!!!
ما هو كل واحد بقدم قيمته…

** باسمي واسم اهلي وعشيرتي واقاربي واصدقائي في الداخل والخارج ، باسم الارامل والمساكين ، والشيوخ والاطفال ، باسم النساء والرجال ، باسم الفقراء والمحتاجين ، باسم كل الاردنيين والسوريين والمصريين ، باسم المغلوبين على امرهم ، الصابرين على ابتلاءاتهم ، الخاشعين في صلواتهم ، باسم كل البشرية نشكر الحكومة الاردنية ، ممثله برئيس وزراءها الدكتور عمر الرزاز واعضاء فريق حكومته على تخفيض اسعار المشتقات النفطية ، بمقدار تعريفة.

وهيك بنقدر نقول انها حكومة اخت اخت تعريفة ..

** تعريفة… مرةواحدة … ليش البعزقه … ألا شلت أياديكم … وتبا لكم وتبا لمن يسكت على تفاهتكم

**اليوم لقيت
تحت البلاط تعريفة
شو بتنصحوني
أفتح مشروع فيها بينفع كازية !!!

**”تعريفة البنزين”
إستخفاف بعقول الاردنيين.

**وقاحة بنكهة الغطرسة – حكومات أخت تعريفة

**إعلان فقدان
تعريفة
الرجاء ممن يجدها
أن يسلمها لأقرب محطة محروقات مع الشكر

**اذا كاسة الكوبيا حسنين دفع فيها (تلاتة تعريفة)
وحكومتنا باعتنا بتعريفة
فعلا”
كوبيا جميلة

** قيمة الشعب عند الحكومة تعريفة . .!!
وبنفس الوقت الحكومة فعليا ما بتسوى تعريفة

** سعر البنزين نزل تعريفة … يعني التنكة نزلت بريزة ..
صدقا هالبلد لازمها #سكلانص

** النفط لم يقبل خفض سعر لتر البنزين لأكثر من ( تعريفة ) على الرغم من تراجع أسعار النفط عالميا

**يخلف عليهم ماقصروا، فراقهم عيد، بس خليهم يتوصوا بموظفي الملكيه ويرفعوا رواتبهم من ٥٠٠ إلى ٥٠٠٠دينار.

** المشكلة البترول الشهر الماضي نزل ورفعوه والشهر الحالي نزل ونزله تعريفه … هاي الحزم الاقتصادية

** بغلوا على الشعب مثلا دنيار وبرجعو برخصو. فلسات. والشعب بكيف. والله شعوب متخلفه

**برفعو دينار بنزلو تعريفه وبقولك عالمي بضحكو عالناس

** كيف زبطت القسمة والناتج تعريفة
يا ريت كانت ثابتة السعر أهون من التعريفة

**واللي بتنزل قرش بكونوا كل زلمها. اسماك قرش

** بالعكس بتكون حكومه جرئيه لانها عارفه فش شعب صاحي يدافع عن حقو والله احنا اخوان التعريفه

**حكومتنا الرشيدة عارفة انه الشعب غير رشيد فهي أدرى بمصلحته
ما حدا رح يتحرك زي العادة طبعا

**سخاء حكومي تخفيض بالقرش ورواتب بمئات الالوف منهم لله على هالكرم

** ممتاز يعني بتوفر على حالك من مصاريف الشتويه من ١٠ الى ٢٠ قرش ممتازات بنسافر فيهم بالصيف الجاي على تركيا

**الواحد مش عارف يجمع من كتر الامتيازات المقدمة للشعب لمبات وتخفيض المشتقات قرش فعلا مؤشرات النهضة واضحة بقوة

** التخفيض قرش او تعريفة ،والرفع خمس قروش ، فمهما خفضو بضل الرفع تحصيل حاصل

**وخطايا الناس اللي ما تقدر تشتري الكاز في رقبة مين مثلا ؟؟؟؟؟؟؟
اللهم زلزال بقوة ١٠ درجات يوخذ الضالمين بس

**كويس اني ما عبيت السيارة بنزين قبل القرار .. يعني عشان أستفيد من هالتخفيض😂😒