بفرجيك بالترويحة
الأستاذ : يللا يا اولاد كل واحد يحط الدفتر قدامه بدي أفتّش على الواجب
الطلاب : استاذ بحركات ولا بدون حركات
الأستاذ : لا بدون حركات
الأول على الصف ( رعد ) : استاذ استاذ حلّيت الواجب ومع حركات ونسخت درس النظافه كمان .
الأستاذ : أحسنت يا رعد صفقوله مش مثل عودة دايماً ناسي واجباته .
أنا – بصوت منخفض – : بفرجيك بالترويحه يا رعد والله لتوكل قتله .
الأستاذ : عودة وين واجبك ؟
أنا : استاذ نسيت دفتري
الأستاذ ( يصرخ ) : كيف نسيت دفترك يا حيوان ؟
أنا : والله حطيته بالشنته امبارح بالليل بس شكلو واقع على الطريق لانو شنتتي مخزوقه .
الأستاذ : روح يا رعد جيبلي عصاه بسرعه
أنا : استاذ والله ما اعيدها
الأستاذ : افتح ايدك بسرعه بدي اضربك ٤ عصي عشان عمرك ما تنسى واجباتك .
أنا : طيب يا استاذ هاي الحقائب الوزارية كلها مخزوقة وكل يوم ناسيين واجباتهم ليش ما يضربهم هاني الملقي ٤ عصي ؟
الأستاذ : عودة الله يرضى عليك بطلت أضربك ، خلص روح اطلع اطلب اذن من المدير عشان تساعد ابوك بفراط الزيتون .
أنا : اه اه وحتى ابوي حكالي روّح بعد الفرصه عشان اجيبلهم معي مسلّة وشوالين خيش وعلبة طون الزهور ، رعد هيني بستناك برا المدرسة والله لتوكل قتله .
