قانون الدفاع 6

قانون الدفاع 6
نهيل الشقران

– شفتي اليوم صدر قانون الدفاع رقم 6
– ودخلك شو هاض قانون الدفاع رقم 6
– هاض اهم شي فيه حقوق عمال المياومه لمسجلين بالضمان، وحقوق العمال والموظفين بالقطاع الخاص.
– طيب يمسخم الفقراء اللي مثل حالاتنا ، لا ضمان ولا سخام شو نعمل بحالنا ؟
– والله اللي مثلي ما عنده حدا موظف لا قطاع عام ولا خاص وبوخذ معونه من الشؤون ما إله الا يستنى طرود الخير اللي بحكوا عنها، ومساعدات اهل الخير
– طرود الخير ؟؟؟ وينها هاي ؟؟؟ ما شفنا اشي منها
– انداري ، النا الله
– والنعم بالله ، اي بس مبارح كان واحد يوزع فيهن ونزل اكمن طرد لناس معارفه واحنا ما شفنا اشي
– هي كلها السولافه خبيصه ورقاق لأنه افرضي في واحد موظف او عامل وعنده ست او سبع نفار وعليه ديون واجار دار منييين يوكل ؟؟؟؟
– لا واللي بزيد الطين بله ( صورني )
– شو أصورك ؟؟؟
– هههه بقصد اللي بعطي بايد وبالثانيه بصور حاله وهو يعطي الفقير بالايد الثانيه
– اه هسا فهمت ، هضول كثار ، اخ بس الله يلعن الحاجه اللي بتجبر الفقير يتنازل عن كرامته مشان رزات وشوية سكر واكمن علبة سردين
– نام يا رجل والصباح رباح