تنك وقراط
على راي العم العزيز ابو نزار امبارح وأني رايح اشتري جاج لقيت العم ابو مفلح الكبير وسلمت عليه سلام حار.
قلي: اسمع يا متعلم.
قلت: ها شو فيه يا عمي يا اصيل.
قال: بقولوا انه هاي الحكومه من التنك وقراط.
قلت: لا قصدك تكنوقراط.
قال: قال شو هاي يعني .
قلت: يعني حكومة كفاءات
قال: اه اني فكرت انها حكومة تنك عيار ٢١ قيراط
قلت: هههه لا يا عمي شو تنك وقراط هاي معناها انه هي حكومه من الناس المتعلمين والمثقفين واصحاب رؤوس الأموال.
قال: اني لا بعرف لا تنك ولا قيراط بدي اياها تخلي الوضع ذهب عيار ٢١ قيراط
قلت: ان شاء الله
قال: الله يجيب اللي في الخير. يا الله يا عمي اشتري جاج قبل ما غد يغلّو الاسعار برمضان وتصير حياتنا تنك اقل من قراط.
قلت ؛ تفاءلوا بالخير تجدوه.
قال : ها بدي اتفاءل وانتظر الفرج من ربنا.
بقلم : ابراهيم عويد حموري
أكاديمي وتربوي
