المرشح و الشاورما … اللي بتعرفه احسن من اللي ما بتعرفه
بعض الناخبين
مثل المواطن المسكين
اللي بكون معه شوية مصاري
شالهن عجنب مشان يتبرطع فيهن
وبضل يحلم طول الشهر بهذيك الطشه
شو بده يوكل وشو بده يشرب
وما في غير هالجمله علسانه
اللي كلنا بنعرفها:
(هالمره بدي اغيّر الاكله… عمر ما حدا حوّش)
وبصير عقله يجيب ويودّي
(مشاوي… لا لا… اكلة سمك مرتبة
ولا اقلك… بروح عمطعم معتبر وبختار من المنيو)
وريالته بتنزل المسكين
ومعدته بتصير تدعي عليه قد ما فكر
وبعد آمال واحلام طويله
بوصل للسوق
بصير ضميرة يأنبه
ويراجع بحالة وبتظهر علامات التردد على وجهه
وما بتيجي عينه على سيخ الشاورما
اللي بفتل فتل
واللي بنقط دهن تنقيط
الا بقلك اجا الفرج
وبتتبدد كل مخاوفه
وبروح كل التردد
و بنطس بنظره وبنسى كل المخطط
تقول محجوبله
ودغري بتنط هالجمله علسانه:
(اللي بتعرفه احسن من اللي ما بتعرفه
اصلا ليش المصروف الزيادة)
وبخش بصراع داخلي اله اول ما اله اخر
بنتهي بفوز نظريته الاقتصادية
ودراسته النفسية المستفيضة
(الخوف من التجديد)
وبخش عمحل الشاورما وبقول للمعلم
زبطلي وجبة شاورما(عادي)عكيف كيفك
وكثر ميونيز وكاتشاب
وما بمضغ آخر قطعة شاورما
الا برجع يندم عالفرصة اللي ضيعها اليوم
اصلا ما في غيرها
لأنه بده يستنى كمان شهر
ناهيك عن المغص والتلبّك المعوي اللي ما خطر عباله وما لمس آثاره
الا بعد الوجبه
بعض المرشحين عامل مثل وجبة الشاورما
زهقناهم وملّينا منهم
ومرضنا منهم واجانا اسهال مع امساك
وبنظل نحلف انه اخر مره رح نجربهم
والمره الجاي رح نغيّرهم
بس لما نيجي نختار
بنختار مثل كل مرّة: شاورما
البعض بنتخبهم عنظرية اللي بتعرفه احسن من اللي ما بتعرفه
او انه هاظ الموجود
يزم انته جربت غيره لحتى تحكم؟
جرّب اللزانيا مثلا
رخيصه وزاكية
صديقي الناخب
غيّر الاكله بما انو الكره بملعبك
احسن ما بكره تندم وتضلك تندب حظك لآخر الشهر الجاي
