بثث نيرات بس
صندوق النكد الدولي , وظرايب حكوماتنا اللي ورا بعظها مثل رشق المطر , وارتفاع أسعار السلع الأساسية , وزيادة رسوم نقل الملكية للسيارات , وأشياء أُخرى إنتوا أدرى بيها . جميعها جعلتني أتوجه لدار فريوان (أبو العُرّيف) عل وعسى الاقي عنده وصفة لهالناس إللي مش حاسة بهالعالم إللي حواليها .
بعد السلام والكلام حتشيت لفريوان السالفة وقلت له يا خوي بدي من عندك رشوش أو حطوط أو سفوف أو لبخة أو أي إشي إنته بتشوفه مناسب .
بعد تفكير عميق وسحبة نفس على سيكارة الهيشي حتشالي وشو رأيك أفقعلك إياهم كل واحد حجاب على كيف كيفك ؟ بدكوا الصراحة ومع إنه معي توجيهي ناجح وما بقتنع بهيتش سوالف بس قلت لحالي جرب يا ولد بلتشن زبطت على ايد أبو العُرّيف .قلت له ماشي يا سيدي بدي أجرب حجاباتك يا فريوان.
فريوان : صدق غير أسويلك حجابات بعمرهن ما صارن ولا راح يصيرن وبأتشمن يوم بتشوف شغلات ما كنت تحلم بيها , بس بدك تجيب لي أتشمن شغلة مشان أزبطلك التشغل
أني : مثل شو خيو
فريوان : بدي شارب صرصور إطرم وذيل فار إخرس وفسوة نسر إعمى ومخ حمار ناشف .
أني : يجازي بلايشك يا فريوان من وين بدي الاقيهن هظول ؟
فريوان : يا خوي أنا في عندي ناس بقدروا يجيبوهن بس عاد بدك تمد ايدك عالجيبة .
أني : وقديش بدك ؟
فريوان : ثث نيرات بكفي منّك
أني : بل لويش الثث نيرات ؟
فريوان : هظول أُجرة الجماعة اللي بدهم يجيبوا الحوايج
أني : ماش الحال موافق بس إحتشيلي شو إللي بدك تسويه؟
فريوان : شوف يا طويل العمر أول حجاب بدي أفقع فيه بنك النكد وأعمي اقماره عمي مشان ما يشوفنا ولا يلد تلاتنا, والحجاب الثاني للحكومة مشان تصير حنونة على هالناس والمساكين المصخمطة , والحجاب الثالث للنواب بلتشن قدروا يحتشوا بدل ما يظلوا يوكلوا بزر وفزدق وقظامة
أني : أووووووه …. جخة واميت بجهزن هظول .
فريوان : غد ظهرية ميّل لعندي وبتلاقيهن جاهزات .
وثاني يوم أعطاني فريوان ثث حجابات . الحجاب الأول قي بنك النكد الدولي أعطيته لواحد صاحبي إله قرابة بشتغل مظيف طيران وبروح على واشنطن كثير , والحجابات الثنين أني تصرفت بيهن واحد حطيته بالعبدلي والثاني عالدوار الرابع .
وفعلاً يا جماعة مثل ما قال فريوان بعد إسبوع شفت العجايب . بنك النكد الدولي بقصقص بزر وبدرم قظامة وفزدق , والحكومة إنعمت اقمارها عنّا , والنواب صاروا حناين عالحكومة .
بتدروا خوف الله إنه حجابات فريوان أصليات بس بجوز أني اللي مخربط بالتوزيعة .
رائد عبدالرحمن حجازي
