دريت يا ابو عزمي ؟؟؟

بسم الله الرحمن الرحيم

( دريت يا ابو عزمي ؟؟؟ )
نهيل الشقران

– دريت يا بو عزمي شو عملوا عشيرة أم رامي ؟
– هاتي اشوف يا حكيمة زمانك ، شو عملوا ؟
– اجتمعوا كبار عشيرتها وقرروا يعملوا صندوق
– صندوق خشب ولا حديد هههه
– يا رجال انا ما بمزح، قرروا يعملوا صندوق للعشيرة ، يتبرع كل مقتدر بمبلغ من المال
– ولويش ؟ حدا منهم قاتل قتيل بدهم يدفعوا ديته ؟؟
– لا يا رجل لا ، عشان يساعدوا الفقرا اللي بعشيرتهم، ويأمنوا احتياجاتهم بهالأيام الصعبة ، مهو بالحضر أكلوها اصحاب المهن الحرة، وعمال المياومة اللي ما عندهم رواتب ثابته.
– بتعرفي والله عمل ممتاز
– اه وشو لعاد يا هيك الشغل يا بلا
– بتعرفي ، بدي أحكي مع كبار عشيرتنا واقترح عليهم نعمل مثل ما عملت عشيرة أم رامي
– بتكون رجل من ظهر رجل ، وربنا بآجرك على هالعمل
– مش بس هيك ، بدي أخليهم يقترحوا انه الأغنياء يطلعوا زكاة أموالهم من هسا وما ينتظروا شهر رمضان
– عفيه ابو عزمي عفيه
– اه بس لا تنسي تعقمي ايديكي قبل لا تغسلي الكاسات
– ههههه يقطع شرك هو في احرص مني
– لا والله ، وربنا يحمي الاردن وشعبها وأرضها من كل سوء