مع برد الشتاء وهطول امطار الخير، لم يكن غير التلفزيون رفيقا لي في بعض من ساعات مساء الجمعة، وخصوصا قبل العشاء، وكان نصيبي مشاهدة مقابله مع أحد معاوني المختار على تلفزيون القرية، ليتحدث عن الفقر والبطالة وفرص العمل، التي هو مسؤولا عنها وما عمل ويعمل من أجل خلق فرص عمل جديده، ولكن ما راعني وأثارني جملة تشدق بها خبير فرص العمل حينما قال:
التاريخ سيذكر ما نعمل وعملنا في العشر سنوات الاخيرة اكثر مما ذكر تاريخ الرومان اللي تواجدوا في القرية 400 سنة والتاريخ أختصرها بسطرين:
حرام عليك تاريخ الرومان بسطرين .. بسطرين بس.
وانت وعملك في عشر سنين بمجلد في التاريخ؟ شو انته اللي بنيت جرش؟
وكمان المدرج الروماني و القلعة وأم قيس وأنظمة الري اللي تحت الارض المعقدة في اطراف سهول حوران وغيرها و غيرها…
معقول يا شيخ؟
والله حرام عليك بسطرين، يا ابن الحلال لو بدي اكتب عن بلاويك بدي مجلد بس امدحك مش رح اكمل السطرين، خليك بشغلك وفرص العمل ومكاتب استقدام الخادمات والعمالة الغير شرعية، و زبط تصاريح العمل اللي كلهم اخذوها زراعيه و بيشتغلوا حراس عمارات.. اهتم و درب عمال و عاملات ابناء القرية والمناطق النائية اللي اقل حظا بوجودك .
خالي … بس لمعلوماتك المعادلة بسيطة:
عدد الخريجين مقابل عدد فرص العمل الجديدة هو الحكم.. مين اكثر فيهم ..
شطارتك تقربهم من بعض حتى نغفر لك غلطة الرومان “400 سنة في قريتي بسطرين”
يلا النا الله….
