خربشات قلم
بين تر و تررررررر هناك عدس أو كورن فلكس وسوشي ورشوف .. ندخل في الموضوع لنعرف شو قصة تررررر …
اليوم ذهبت الى البنك لاستلم باقي الراتب ، وصلت باكرا وانتظرت حتى الثامنة ونصف لافوز باول الدور .
اول ما فتح البنك مظاهرة متقاعدين موظفين اتحاد عمال نقابات محامين وباقي الشعب دخلوا من اليمين و الشمال ومن فوق ومن تحت … ماكنة الدور تعطلت وتعطل معها النظام والصبر وطول البال … الموظفة فقدت اعصابها ” ايش هاد ما في اخلاء ما في حياء ما في زوووء ” … صمت الجميع فجأة فقلت : يا حجة اذا كان ما في اخلاق عندنا ليكون في ادارة عندكم وحسن تصرف … قالت لو سمحت لا تئول حجة قلت مش مهم الالقاب المهم مشيني لانه ما عندي صبر وما عندك نظر وانتي من ربع ساعة شايفيتني من ورا الباب ولما دخلتي قلتي يا حاج بدك تفوت عالبنك تسحب مصاري .. وجاوبتك لا جاي اتبرع وما زعلت منك لما قلتيلي يا حاج … المهم مشيني .. قالت : لما امشي هاد العميل … ويا اخوان صدقوني خمس دقايق وماكنة عد الفلوس ترررررررررررررررر .. ولما خلصت قربت وابتسمت واعطيتها البطاقة .. قالت تفضل قديش بدك تسحب ؟ قلت لها ” تر ” قالت مش فاهمة قلت بصراحة انا ناقصني شوية سيولة وبدي اسحب كل الرصيد ..
قالت : هادا حئك لا تستحي … ودخلت على حسابي وكان فيها عقل وطار وكان عندها صبر وخلص وكان عندها امل و يأست .. تطلع بالشاشة مرة وبوجهي عشر مرات .. قلت معقول مشبه علي ؟ المهم بتقول يا حاج رصيدك “6”دينار وخمس واربعين قرش … قلت اسحبيهم مش بقولك بحاجة لسيولة .. قالت انت مش بحاجة لسيولة انا اللي بحاجة لطبيب نفسي ؟؟ ضحكنا سويا واعتذرت وقالت يا ريت ما اشوف وجهك مرة ثانية …..
