مطرح ما سرق كرموه
في أسكان الخندق السلط مكان حياة الطفولة العذبة كان في كرمين
كرم ابوسالم نسور مزروع زيتون وتين ولوز
وكرم واحد من القضاة ( عايش في امريكا اعتقد ) وكان مزروع تين وعنب وزيتون ونبق .
وكانت الحارة تتخللها بعض الأشجار المثمرة مثل مشمشة بيت ابو محمد عربيّات واسكدنيا بيت ابو صالح العدوان وسفرجلة بيت أبو زاهي وتينة دار ابو ابراهيم الخلايلة وخوخة بيت ابو خلدون قطيش وتوتة دار أبو كامل الغول …
كانت هذه الكروم وهذه الأشجار وجه وقبلة اولاد الحارة في العطل ووقت ترويحة المدرسة وأحيانا في الفرصة في أواخر الثمانينات وأوائل التسعينيات من القرن المقفي …
تروح تلقط خوخ عنب تين مشمش اسكدنيا لوز لحتى تشوف نجوم الظهر لغاية ما ينتهي موسم الشجر .
كنّا نروح بس ما كنّا نوخذ معنا على البيت ولا حبه …
في البداية كان الخوف من الأهل
وسؤالهم لنا من أين لك هذا ؟
وطبعاً بتوكل ” كتّله ” بمطرق لوز بتخليك تكره المشمش والي زرعوه .
فبقي الحال على ذلك تلقط وتوكل محلك مع تأنيب الضمير بأقتراف جريمة السرقة والخوف من شكوى احد الجيران للأهل …
مرت الأيام على هذه الحال حتى ربنا رزقنا بواحد أبن حلال وعلم بذلك وما يدور في الخفايا فقال :
أسمعوا يا اولاد الي بتعملوه مش سرقة وعلى مسؤوليتي
طبعا تهلهلت وجوهنا فرحاً بذلك
قلنا طيب شو هاي ؟
قال : القصة مش قصة شو هاي
مادام انكوا بتوكلوا محلكوا وما بتوخذوا اشي على الدار فلا تعتبر سرقة . اذا اخذت على الدار اشي تعتبر سرقة وبطولك حرام …
ومن هظاك اليوم تعلمنا السرقة على أصولها وبما يرضي الضمير وحسب فتوى صاحبنا …
هذا هو الجواب على استفسار محمد مغامس الخوالدة وشاهين الخوالدة عند سؤالهم ليش الفاسدين بوخذوا المصاري على سويسرا .
محمد وشاهين
الجماعة في عندهم فتوى من واحد كبير انه اذا آخذوا المصاري على الدار تعتبر سرقة
فبوخذوهن على سويسرا وجزر العذارى
وزي ما قال المثل
مطرح ما سرق كرموه.
