لا تذكرني بماضيك الجميل …….
اول ما اطلعت على عمان،وكنت متخرج جديد وافكر انة عمان مدينة الاحلام وملتقى عظماء الانام، الله وكيلكوا وبعدنا بنقول يا هادي،اجالكوا اقدم واحد فينا بالسكن اقترح انة نطلع نطش ونشوف الحياة، وكيف الطبقة المخملية عايشين، ونشعر بنفس الشعور ونصير من علية القوم، لانة كنا نعتبر انة سكان عمان كلهم اغنياء، والحنفيات عندهم بتنقط مصاري وليرات…..
ولكن اكتشفنا بعدين انة اللي ساكنين بعمان اغلبيتهم ماكلين روح الخل من القروض والاقساط اللي عليهم،بس بكابروا قدام قرايبهم.
المهم……
صاحبنا كان بده يعرط علينا، وانة بعرف كل اشي بعمان، خزق خزق، وزنقة زنقة، فاقترح انة نقصدر بشارع الجامعة الاردنية، وبعدها نتعشى بالمطعم الصيني، وسال شو بتحبوا توكلوا يا شباب، خلونا نقرر قبل ما نطلع،وهون بلش الاكشن….
شو المطعم الصيني، اي العربي ما بثبته وكنت اخاف من الانجليزي، مش لحتى يجيني واحد يقلي صيني، وكمان كل فكري انة الواحد عيب يقول ما بعرف!!! فقلت بعقلي خليني اسكت تشوف شو الشباب بحكوا، وانا بحكي اخر واحد….
ولكن الحظ الردي رح يضل ردي، وكوني الشب الجديد بالسكن انا وكمان واحد ثاني اتعس من حالتي، اجا اقترح التعيس المتعوس بانة بلال بختار الي واله، ولك الله لا يعطيك العافية، انا شو معرفني بغير الحمص والفلافل، ومين طلب منك تحكي او تشارك (ول عليك ما اخمك )…..
وساعتها اعرفت انه لازم اجاوب ووبلاش ابين هبيلة بعد ما الكل سكت، وصاروا ينظرولي نظرة الشيعة للخميني….
استجمعت كل تفكيري وخبرتي بالحياة، وحطيت اجر على اجر، مع تكشيرة وعقد للحاجبين…… وقلت :
خلونا نوكل زيت وزعتر على الطريقة الصينية،شو رايكوا يا شباب؟؟ ، واعطيتها جعصة، مع فرد الكتفين وارجاع الظهر الى مسند الكرسي….
مباشرة الشب اللي كان يعرط علينا زعل وقال : انا بطلت اطلع، وطلع من الغرفة….. طيب شو دخلني اذا الجهلة اللي معك صاروا يضحكوا، اصلا كانوا يضحكوا علي مش عليك…..
وبعد اسبوعين تركت الشغل وارجعت الى اربد المليحة
