رسالة الى الزوجه المرحة
عند عودته من العمل وفور اغلاقه باب البيت حافظي على وجهك العبوس وشعرك المنفوش وبوزك الممدود ….
لا تتبسمي حتى لرغيف الخبز السخن الا عند استخدام الواتس اب وحالة المكالمات الهاتفية الخاصه مع الصديقات والاهل فقط .
ثم قومي بالثرثرة مثل نشرة الاخبار المسائية او مثل المعلق الرياضي الخليجي لحظة احراز الهدف الاول .
إبدائي مقدمة أحاديثك بعبارة كنت عند اهلي كذا ..وكذا… ثم تقدمي له بالشكوى والطلبات فور دخوله الي البيت و ضعي اللوم على الاولاد وشغل البيت الذي لا ينتهي وادعي الدعوة المتكررة ” الله يخلصني من هالعيشة”
لا تحضري العشاء له بحجة انك لست جائعة ثم كوني اول الجالسين عالسفرة عندما يحضره من المطعم وكلي نص الاكل واحكي بعدها “ما الي نفس بالاكل واصلا انا عاملة رجيم”. بس لا تنسي قبل ما حدا يتقدم للاكل خذي الك عشر خمسة طعش صورة ونزليهم عالفيس بوك واكتبي يسلم ايدين ابو محمود عزمنا اليوم عالعشاء….
طبعا ابو محمود يحكي لنفسه وقلبه موجوع وعينه تدمع “يا ريته سم الهاري ” .
قبل موعد نومه ذكرية بدفع فواتير المياه والكهرباء والمدارس واشتراك النت واذا في شوية فساتين ناوية تشتريها ذكريه فيهم……
اول ما ينام ويباشر بالحلم الاول اصرخي صوت عالي على الاولاد خليه يشعر انه في برميل متفجر نزل عالبيت ……
طبعا رح يصحى ويطلع يمين وشمال ويلاقي ابنه محمود بتهاوش مع اخوه الصغير على ريموت التلفزيون.
في هذه اللحظة رح يحكي لك “حسبي الله ونعم الوكيل” ثم يرجع ينام كونه الامر لا يستدعي ترك الحلم .
اذا رجع ينام اتركيه وعند ما يبلش اول شخير اضربي واحد من الاولاد خلي يصرخ صوت يوصل لاقرب مسجد.
واذا صحي احكي له “شايف ابنك ترك الثلاجه فاتحه”
واذا رن تلفونه وهو نايم لا تترددي تصحيه حتى يرد على التلفون واحكي له “قوم رد على اخوك” … طبعا رح يحكي لك “خليه بس اصحى برجع بحكي معه”.
هون يجي دور شطارتك شيطانك……احكي له “رد بلاش يكون حدا من قرايبك اتوفى وخصوصا ان أبوك كان بكح كثير الاسبوع الماضي”.
اكيد رح يصحى من نومته ويكمل تلفونه مع اخوه ، طبعا اخوه رن عليه حتى يساله عن ميكانيكي شاطر بعرف يصليح سيارات كيا سيفيا مو موضوع موت او مرض .
بس يسكر الخط مع اخوه رح يطلب فنجان قهوة او كاسة شاي حتى يروق ….
احكيله “القهوة تعملك ارق والشاي برفع لك الضغط اجيب الك مية بارده”…..
في هاي اللحظة رح يرجع ينام بس اتاكدي اذا انها نومة عادية او نهائية….
