خطوط .. و حظوظ
تعلمنا في المدارس أنواع الخطوط ، خط الرقعة .. خط النسخ .. الخ . و في الجغرافيا هناك خطوط الطول و خطوط العرض .. الخ و هناك خطوط للاتصال ..موجودة في هواتفكم . ممنوع اعمل لها دعاية !
اما الخط الجديد الذي اصبح متداولا عند فلاسفة الاقتاد و النهب .. في هذ ا العصر ، فهو خط الفقر ..
خط الفقر حاد كالسيف ، و امضى من شفرة جيليت جي تو !! هذا الخط ماسك طرفيه و شادهم ع الآخر حكومات نخرها الفساد و شلة من الفاسدين اللي نهبوا الخزنة و الخزينة !!
خط الفقر ضاغط ع بعض الناس لحد رباط بسطارهم ، و بعضهم الخط للركب و بعضهم زانق ع نفسه .. !!! و لكن الجميع أسفل خفض ، تحت خط الفقر و النقر ..
البعض خط فقره ٢٠٠ دينار و بعضهم ٣٠٠ دينار و بعضهم ع ” فل” عداد الفقر . فمن قائل ٤٠٠ دينار و من قائل ٥٠٠ دينار ، و ذلك بحسب رواية الناطقين بالضاد عن الحكومة و المالية .. يعني ع هذه الحسبة .. ٩٠% من الموظفين تحت الخط .. و يا ويل اللي برفع راسه عن الخط .. الا اذا بالسرقة اشتغل ع ” بكم” غمارتين او طلع ركاب بهالكيا .. الله يخليها ..
خط الفقر مسلط و له صفارة مثل خط ال ١٨ في ملعب كرة القدم . الغريب ان ارتفاع الخط يتناسب عكسيا مع ” الطفر ” و ” قلة الزفر ” !!
كل ما طفرت الناس و طار الراتب من ايديها مثل ما يطير العصفور .. برفعوا الجماعة الخط .. و كاننا ايام زمان .. لما كنا ننط حبلة !! بس حبلتهم صعب نطها .. و كلسع ” نتكعبل ” فيها !!
السبب عظمنا طري على شد الحيتان للحبل / ابو خط الفقر !!
الفلاسفة الدجالون و المنظرون الاقتصاديون .. العتاقى و الجدد .. يبشروننا بالعدالة بين الجميع .. و إن الحبل سيبقى مرفوعا فوق رؤوس الجميع ، حيث أنهم سيقعدوا على تاليها ، ونصير كلنا بالهوا سوا ..
كيف ???? يعني الشعب كله سيسجل في الشؤون الاجتماعية و الشعب كله رح يصير يداوم قبل موظفي البنوك .. حتى يلحق الراتب .. اللي برخي الحبل عن رقبته لأول أسبوع من الشهر .. و بعدين ربك يعين .. اللي بنط من ناره بفكروه تاعين الحبل انه مبسوط و بمراجيح العيد ..
في ناس متفائلة كثير و بتقول من حبل لحبل بفرجها ربك .. فكاك الحبول ! و في منظر بيقول الناس راغبة تظل تحت حبل او خط الفقر. ..و دليلة شوف البلد ” انتلت ” محلات شاورما !!
و كل يوم فرع جديد ع كل زاوية .. و اللي مش عاجبة ” السيخ” ياخذ ” فاهيتي ” و ” تاهيتي”بس شو جاب تاهيتي للسيرة .. ما علينا . و بعدين عندنا صناعات و مشاريع مجزية ، حيث ان الناس عافت ” مية ” السلطة . و صارت تشرب مي مفلترة !! و بذلك ازدهرت حرفة خض المي ، و معالجتها !!
عودة لخط الفقر ، مرة في الزمن الماضي ع زمن الفراعنة ، طلع شب فرعوني سايق ” تكتك ” مش عربة رعمسيس الخامس عشر .. و صاح من خط الفقر اللي حاز ع رقبته .. و في الروايات .. اهتزت الاهرامات ، و فزع الفراعنة المحنطون .
الخلاصة :
الدنيا .. خطوط .. و .. حظوظ
– احمد المثاني –
